Նավթ արտահանող երկրների կազմակերպությունը (ՕՊԵԿ) 2015 թ. դեկտեմբերի համեմատ՝ հունվարին ավելացրել է նավթի արդյունահանումը 131․000 բարելով օրական՝ մինչև 32․33 մլն բարել օրական: RIA Novosti-ի հաղորդմամբ՝ այս մասին ասվում է կազմակերպության փետրվարյան զեկույցում՝ հղում անելով երկրորդային աղբյուրների տվյալներին:
Այդպիսով, ՕՊԵԿ-ը նոր տարում շարունակել է բարձրացնել արդյունահանման իր քվոտան, որը պաշտոնապես կազմում է 30 մլն բարել օրական:
Արդյունահանման աճ հունվարին արձանագրվել է հիմնականում Նիգերիայում, Սաուդյան Արաբիայում, Իրաքում և Իրանում, մշակման նվազում է գրանցվել Անգոլայում, Վենեսուելայում և Ալժիրում:
Հունվարին աշխարհում նավթի արդյունահանման ընդհանուր ծավալը, նախնական տվյալներով, աճել է 0․03 մլն բարելով օրական՝ մինչև 95․64 մլն բարել օրական:
