Տարվա ամենածախսատար օրերն հետևում են։ Դեկտեմբերի համահայկական առևտրից հետո շուկայում սպասված գնաճ է։ Գնաճի մասին լուրը փաստում է Ազգային վիճակագրական ծառայությունը։ Այս տարվա հունվարին, 2015-ի դեկտեմբերի համեմատ, ապրանքների և ծառայությունների մատուցման մասով արձանագրվել է 2,2 տոկոս գնաճ: 2 տոկոս գնաճն արձանագրվել է Երևանում, ամենաբարձրը` Կապանում՝ 2.9 տոկոս։ Պարենային 13 ապրանքախմբերից 8-ում արձանագրվել է 0,1-ից մինչև 31,5տոկոս գնաճ, ընդ որում՝ բանջարեղեն-կարտոֆիլ ապրանքային խմբում՝ 31,5 տոկոս, միրգը թանկացել է 8,5 տոկոսով, իսկ ձուն՝ 8,3 տոկոսով։
Դեկտեմբերի ավանդական թանկացումներից ժողովուրդը հունվարյան գնաճի հետևանքները մաշկի վրա է զգում։ Ավելին՝ թանկացումն ակնհայտ է նաև 2015-ի և 2016-ի հունվար ամսի համեմատությամբ։
Առևտրականների մի մասը բանջարեղենի գնաճը բնական է համարում. բանջարեղենը ջերմոցներից են ստանում, բնական է, որ թանկ է։ Առևտրականների մի մասն էլ հավաստիացնում է՝ թանկացում չկա, հետո մեկնաբանում՝ առևտուր չկա, ինչ թանկացման մասին է խոսքը։
Փաստը մնում է փաստ. Ազգային վիճակագրական ծառայությունը շուկայում գնաճ է արձանագրել։ Ժողովրդի համար էլ հունվարյան թանկացումները նորություն չեն, հունվարյան թանկացումների նկատմամբ վաղուց են դիմադրողականություն ձեռք բերել։