Դեմոկրատական կուսակցությունից ԱՄՆ նախագահի թեկնածու Բեռնի Սանդերսը Նյու Հեմփշիրում փրայմերիզի հաղթանակից հետո հռչակել է երկրում «քաղաքական հեղափոխության» սկիզբ, որն իշխանությունը կվերադարձնի ժողովրդին: Այս մասին գրում է RIA Novosti-ն:
«Այն, ինչ սկսվեց մեկ շաբաթ առաջ Այովայում, այն, ինչ այսօր հաստատեցին Նյու Հեմփշիրի ընտրողները, ոչ այլ ինչ է, քան քաղաքական հեղափոխության սկիզբ»,- հայտարարել է Սանդերսը:
«Այս քաղաքական հեղափոխությունը կմիավորի մեր միլիոնավոր մարդկանց ՝ աշխատավորներին, որոնք մերժվել են քաղաքական գործընթացում, երիտասարդությանը, որը երբեք դրան չի մասնակցել, սպիտակամորթներին ու սևամորթներին, լատինաամերիկացիներին և ասիացի ամերիկացիներին, գեյերին, կանաց և տղամարդկանց, մարդկանց, ովքեր ծնվել են Ամերիկայում, և ովքեր այստեղ ներգաղթել են: Մենք կհավաքվենք, որպեսզի հստակ ու բարձր հայտարարենք, որ մեր մեծ երկրում կառավարությունը պատկանում է մեզ բոլորիս, այլ ոչ թե ընտրարշավները հովանավորող մի քանի հարուստների»,- ասել է նա:
