Շվեդիան կողմ է Եվրամիության և Հայաստանի միջև հավակնոտ պայմանագրի ստորագրմանը: Այսօր Երևանում հայտարարեց Շվեդիայի արտաքին գործերի նախարար Մարգոտ Վալստրյոմը՝ ողջունելով Բրյուսելի և Երևանի միջև բանակցությունների մեկնարկը՝ նոր իրավական փաստաթղթի ստորագրման նպատակով:
Տիկին Վալստրյոմն ասաց, որ Եվրամիություն-Հայաստան նոր համաձայնագիրը ծառայելու է թե՛ Եվրամիության, թե՛ Հայաստանի արժեքներին ու շահերին և օգտակար պլատֆորմ կստեղծի ապագա համագործակցության համար:
«Մենք արդեն սկսել ենք քննարկել շարունակական աշխատանքը Հայաստանում՝ ուղղված ուժեղ, ժողովրդավարական և արդյունավետ ինստիտուտների ստեղծմանը, որոնք հիմնվելու են օրենքի իշխանության վրա և ազատված են լինելու կոռուպցիայից»,- նշեց նա:
Հայտնի է, որ Շվեդիան Լեհաստանի հետ միասին եղել է Եվրամիության Արևելյան գործընկերություն ծրագրի շարժիչ ուժը, առանցքային դերակատարը, և, ի դեպ, հենց Շվեդիայի նախկին արտգործնախարար Կարլ Բիլտն էր ժամանակին բավական կոշտ երկընտրանքի առջև դնում Հայաստանին՝ ասելով, թե Հայաստանը պիտի ընտրություն կատարի Ռուսաստանի և Եվրամիության միջև: Իսկ 2014-ին, երբ Հայաստանն արդեն հայտարարել էր Մաքսային միությանը միանալու մասին, իսկ Ուկրաինան ստորագրում էր Եվրամիության հետ Ասոցացման համաձայնագիրը, Երևանում էլ որոշ հույսեր կային, որ Հայաստանին էլ նման հնարավորություն կտրվի, Բիլտն ասաց, թե Հայաստանն «ուրիշ լիգայից» է և չի կարող դիտվել Ուկրաինայի հետ նույն շարքում:
Այսօրվա ասուլիսում, ցավոք, հնարավորություն չեղավ հարցնելու Շվեդիայի նոր գլխավոր դիվանագետին՝ արդյոք Շվեդիան շարունակո՞ւմ է որոշել այդ «լիգայի» անդամներին: Այդուհանդերձ, Մարգոտ Վալստրյոմը խոսեց Արևելյան գործընկերությունը շարունակելու անհրաժեշտության մասին՝ ընդգծելով, որ Եվրամիությունն այժմ ավելի անհատականացված մոտեցում է ցուցաբերելու այդ ծրագրի անդամներին, որոնց մեջ մտնում է նաև Հայաստանը, և աշխատելու է «ավելին՝ ավելիի» դիմաց սկզբունքով:
«Մենք այն երկրների շարքում ենք, որոնք ցանկանում են, որ Արևելյան գործընկերությունը շարունակվի և մնա Եվրամիության օրակարգում որպես գլխավոր հարց: Կարող եք վստահ լինել և հույս դնել մեզ վրա: Մենք պատասխանատվություն ենք զգում բոլոր այն երկրների համար, որոնց ներգրավել ենք: Մենք այստեղ ենք աջակցելու և օգնելու նպատակով և կարծում ենք, որ ինտենսիվ բանակցություններն առաջ գնալու լավագույն ճանապարհն են: Մենք պետք է հստակ իմանանք, թե ինչ է կատարվում այստեղ, ինչպես են ընթանում բարեփոխումները»,- ասաց Շվեդիայի արտաքին գործերի նախարարը:
Ավելացնենք, որ Շվեդիայի արտգործնախարարի՝ Հայաստան կատարած պաշտոնական այցի շրջանակներում Հայաստանը և Շվեդիան ստորագրել են կրկնակի հարկումից ազատելու մասին համաձայնագիր, որն ուղղված է երկու երկրների տնտեսական կապերի ամրապնդմանը և ներդրումների խրախուսմանը:
Լուսանկարը` PAN Photo-ի