Երևանի քաղաքապետի լիազոր ներկայացուցչի որոշմամբ՝ ի գիտություն է ընդունվել «Հայ ազգային կոնգրես» կուսակցության գործադիր քարտուղար Սամվել Աբրահամյանի իրազեկումը՝ մարտի 1-ին ժ.11.00-23.00 Ազատության հրապարակում հավաք և հավաքի ընթացքում՝ ժ.19.00-ին Ազատության հրապարակ–Մաշտոցի պողոտա–Գ.Լուսավորչի փողոց–Իտալիայի փողոց–Հանրապետության հրապարակ–Նալբանդյան փողոց–Թումանյան փողոց–Ազատության հրապարակ երթուղով երթ անցկացնելու վերաբերյալ։
Միաժամանակ քաղաքապետի լիազոր ներկայացուցչի որոշմամբ սահմանվել է սահմանափակում ՀՀ քաղաքացի Վարուժան Ավետիսյանի կողմից մարտի 1-ին ժ.00.00-24.00 Ազատության հրապարակում նախատեսված հավաքի ժամանակի նկատմամբ՝ առաջարկելով հավաքն անցկացնել ժ.08.00-22.00-ը: Մարտի 1-ին Ազատության հրապարակում նախատեսվող հավաքի ընթացքում վրանների տեղադրումը մերժվել է:
Երևանի քաղաքապետի լիազոր ներկայացուցչի որոշմամբ ի գիտություն է ընդունվել նաև մարտի 1-ին ժ.19.30-21.30 Ազատության հրապարակ–Հյուսիսային պողոտա–Աբովյան փողոց–Հանրապետության հրապարակ–Ամիրյան փողոց–Մաշտոցի պողոտա–Ազատության հրապարակ երթուղով երթի անցկացումը:
Լուսանկարը՝ Photolure-ի