«Ո՞վ է սրում իրավիճակը. Ադրբեջանը». Էդվարդ Նալբանդյան

Հայաստանը և Մինսկի խմբի եռանախագահները շահագրգիռ են Լեռնային Ղարաբաղի հակամարտության գոտում ստատուս-քվոյի փոփոխմամբ, ոչ թե ստատուս-քվոյի պահպանմամբ: Այսօր՝ փետրվարի 9-ին, հայտարարեց ՀՀ արտաքին գործերի նախարար Էդվարդ Նալբանդյանը Շվեդիայի արտգործնախարարի հետ համատեղ մամլո ասուլիսի ժամանակ՝ պատասխանելով Բաքվի մեղադրանքներին, թե Հայաստանն ամեն ինչ անում է ստատուս-քվոն պահպանելու համար:

Նախարարի խոսքով՝ ստատուս-քվոյի պահպանման առաջին պատասխանատուն հենց Ադրբեջանն է, որովհետև այն կարելի է փոխել միայն խաղաղ բանակցությունների, պայմանավորվածությունների ձեռքբերման միջոցով, իսկ Ադրբեջանն անտեսում է Մինսկի խմբի կոչերը՝ վերահաստատել հրադադարի ռեժիմի պահպանման հանձնառությունները, անտեսում է շփման գծում հետաքննությունների մեխանիզմ ստեղծելու կոչերը:

«Ո՞վ է սրում իրավիճակը. Ադրբեջանը: Ո՞վ չի արձագանքում եռանախագահների կոչերին, որ պետք է վերահաստատել հանձնառությունը բանակցային, խաղաղ ճանապարհով հիմնախնդրի կարգավորման վերաբերյալ: Ո՞վ է դեմ դուրս գալիս հետաքննության մեխանիզմի ստեղծմանը: Ադրբեջանցիները հորինել են, թե եթե հետաքննության մեխանիզմը ստեղծվի, ապա դա կնպաստի ստատուս-քվոյի պահպանմանը: Ճիշտ հակառակը. եթե մեխանիզմը ստեղծվի, այն կլինի ոչ միայն հետաքննության, այլև կանխարգելիչ մեխանիզմ, որը թույլ կտա ապահովել ավելի բարենպաստ պայմաններ բանակցությունների շարունակման համար և բանակցությունների միջոցով գալ պայմանավորվածությունների՝ ուղղված հիմնախնդրի կարգավորմանը: Հուսով ենք, որ Ադրբեջանում վերջապես կհասկանան, որ այս կեցվածքն իրենց որևէ առավելություն չի տալիս: Իսկ մենք եռանախագահների հետ շարունակելու ենք մեր ջանքերը՝ ուղղված հիմնախնդրի բացառապես խաղաղ կարգավորմանը, որովհետև այլըտրանք չկա բանակցություններին»,- նշեց ՀՀ ԱԳ նախարարը:

Իր հերթին, Շվեդիայի արտաքին գործերի նախարար Մարգոտ Վալստրյոմը շեշտեց, որ Լեռնային Ղարաբաղի հակամարտությունը ռազմական լուծում չունի:

Իր խոսքում տիկին Վալստրյոմը մասնավորապես ասաց. «Այսօրվա հանդիպման ժամանակ մենք, իհարկե, քննարկեցինք նաև Լեռնային Ղարաբաղի հարցը: Եվ սա հնարավորություն է մեզ համար ավելի լավ հասկանալու, թե որոնք են ձեր ցանկություններն ու մտահոգությունները: Մենք համաձայն ենք, որ այս հակամարտությունը ռազմական լուծում չունի: Իհարկե, հնարավոր չէ համոզված լինել, որ էսկալացիա չի լինի, բայց մենք հույս ունենք, որ կողմերը կկարողանան գտնել լուծում, և դա կլինի Մինսկի խմբի համանախագահների հովանու ներքո: Ուստի մենք քաջալերում ենք երկու կողմերին էլ ակտիվորեն աշխատելու խնդրի խաղաղ լուծման համար»:

 

Լուսանկարը՝  Photolure-ի