Billboard-ի փոխանցմամբ՝ Նյու Յորքի նախկին քաղաքապետ Ռուդոլֆ Ջուլիանին քննադատել է երգչուհի Բեյոնսեին՝ ոստիկանության վրա «հարձակվելու» համար։ Խոսքը Սանտա Կլարայի (ԱՄՆ, Կալիֆոռնիա) Levi’s Stadium մարզադաշտում Սուպերբոուլի ընդմիջման ժամանակ Բեյոնսեի ելույթի մասին է։
Բեյոնսեն բեմ է բարձրացել Coldplay-ի և Բրունո Մարսի հետ։ Բեյոնսեի ելույթը հիացրել է նրա բազմաթիվ երկրպագուներին, սակայն դրա հետ մեկտեղ քննադատության է արժանացել հասարակության մի շարք ներկայացուցիչների կողմից, որոնք նրա երգում ենթադրյալ ակնարկ են նկատել «սև հովազներին» (աֆրոամերիկյան ձախ արմատական կազմակերպություն)։
Ջուլիանին հայտարարել է. «Սա ֆուտբոլ է, և ոչ թե Հոլիվուդ, և ես իսկապես վրդովեցուցիչ եմ համարում, որ նա օգտագործել է այս հարթակը ոստիկանության սպաների վրա հարձակվելու համար։ Ոստիկաններն այն մարդիկ են, որ պաշտպանում են նրան ու մեզ, որոնք պահպանում են մեր կյանքը»։