Իրանը դիտարկում է Հայաստանում գազամատակարարումը 5 անգամ ավելացնելու հնարավորությունը՝ այն դարձնելով օրական 5 մլն խորանարդ մետր, սակայն պաշտոնական Երևանը առայժմ լուռ է և չի արձագանքել Իրանի Գազի արտահանման ազգային ընկերության տնօրենի հայտարարությանը:
Իրանագետ Ռուդիկ Յարալյանը «Առաջին լրատվական»-ի հետ զրույցում այս առնչությամբ ասաց. «Կանխատեսվում էր, իհարկե, որ պատժամիջոցների չեղարկումից հետո Իրանի ուշադրությունը Հայաստանի նկատմամբ անհամեմատ կմեծանա»:
Մեր զրուցակիցը հոռետեսական է համարում այն հայտարարությունները, թե Ռուսաստանը իբր Հայաստանին թույլ չի տա հարաբերություններ զարգացնել: Նրա խոսքով՝ այդ հարաբերությունները ձեռնտու են առաջին հերթին հենց Ռուսաստանին. «Իմ կարծիքով՝ հայ-իրանական համագործակցության կոնտեքստում կարծես իրանական կողմը նախապես պայմանավորվածություն է ունենում ռուսական կողմի հետ, հետո նոր քննարկում հայկական կողմի հետ: Կարծում եմ, որ Հայաստանը ջրբաժան չի հանդիսանա ռուս-իրանական շահերի առումով»:
Իրանագետը կարևոր է համարում նաև այն հանգամանքը, որ առայժմ հայտնի չէ՝ իրանական կողմից գազի հավելյալ ծավալները որ ոլորտին կտրամադրվեն:
Նա կարծում է, որ թեև մեր տարածաշրջանում Իրանի և Ռուսաստանի միջև կա որոշակի մրցակցություն, այնուամենայնիվ՝ կա նաև համագործակցության պոտենցիալ, որը շատ բարձր մակարդակով իրացվում է. «Մենք կարող ենք օգտագործել այն օղակները, որոնք ոչ թե տարանջատում են ռուս-իրանական շահը, այլ կապակցում են միմյանց, և այդ կոնտեքստում ստանալ մեր շահը»:
Մեր զրուցակցի խոսքով՝ հայ-իրանական հարաբերություններում շեշտը պետք է դնել Հայաստանը Իրանի համար տարանցիկ երկիր դարձնելու գաղափարի վրա. «Հայ-իրանական հարաբերություններում սա է այն կարևոր ուղղությունը, որ կարող է մեր ազգի, մեր պետության համար շատ կարևոր լինել»:
Ռուդիկ Յարալյանը անհամեմատելի է համարում Իրան-Հայաստան և Իրան-Ադրբեջան նախագծերը. «Հայաստանի հետ Իրանի նախագծերը շատ ավելի հեռանկարային են»:
