Այս պահի դրությամբ կա Մարդու իրավունքների պաշտպանի 2 թեկնածու՝ Արման Թաթոյան և Զարուհի Փոստանջյան:
Ազգային ժողովի Պետաիրավական հարցերի հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը «Առաջին լրատվական»-ի հետ զրույցում ի պատասխան հարցի՝ ինչո՞ւ ՄԻՊ պաշտոնում ՀՀԿ-ն հատկապես կանգ առավ արդարադատության փոխնախարար Արման Թաթոյանի թեկնածության վրա, նշեց, որ Արման Թաթոյանը ունի աշխատանքի մեծ փորձ և՛ մեր հանրապետությունում, և՛ միջազգային կառույցներում:
Հովհաննես Սահակյանը չի կիսում այն տեսակետը, թե Արման Թաթոյանը «հրապարակային չէ և հանրային լայն ճանաչում չունի»:
Մեր զրուցակցի կարծիքով՝ նախկին Օմբուդսմենի հրաժարականը եթե կապված լիներ քաղաքական ճնշումների հետ, ապա մենք պետք է Պաշտպան չունենայինք դեռ 2014 թվականին, երբ նրա զեկույցը շատ ավելի բուռն էր, քան 2015-ի զեկույցը. «Եթե կա մեկ քաղաքական առաջադրում, ապա դա բացառապես Զարուհի Փոստանջյանն է: Բացառապես Զարուհի Փոստանջյանն է, որ քաղաքական ուժի անդամ է, բացառապես նա է, որ որպես պատգամավոր հանդես է գալիս, և առաջադրումն էլ տարբեր քաղաքական ուժերի կողմից է»:
Հովհաննես Սահակյանը Զարուհի Փոստանջյանին չի տեսնում ՄԻՊ պաշտոնում. «Ժամանակները փոխվում են, և մենք պետք է համահունչ քայլենք առաջ: 90-ականներին Մարդու իրավունքների պաշտպանը բոլորովին այլ գործառույթ ուներ իրականացնելու, 2000-ականներին՝ լրիվ այլ, իսկ այնուհետև բոլորովին այլ խնդիր էր դրված Պաշտպանի ատջև»:
Պետաիրավական հարցերի հանձնաժողովի նախագահի կարծիքով՝ Պաշտպանը չպետք է միայն կանգնի հանրահավաքներում ցուցարարների կողքին, այլ պետք է ունենա բավականին լուրջ գիտելիքներ, որը կարողանա համակարգային փոփոխությունների տանել և ազդել նաև օրենսդրության ձևավորման վրա. «Իմ խորին համոզմամբ՝ Մարդու իրավունքների պաշտպանը չի օգտվում իրավունքներից, այլ ունի որոշակի պատասխանատվություն և պարտավորություն: Մենք պետք է կարողանանք ճիշտ դաշտ, ճիշտ սկիզբ դնել, որպեսզի ՄԻՊ-ը կարողանա այս նոր Սահմանադրությամբ իր լիազորություններն իրացնել»:
Հաշվի առնելով Կարեն Անդրեասյանի հրաժարականի նախադեպը՝ Հովհաննես Սահակյանը կարծում է, որ «Սահմանադրության և Մարդու իրավունքների պաշտպանի մասին նոր օրենքում պետք է մտցնել մի տարր, որ նա առնվազն հաշվետու լինի հանրության առջև»:
