ՀՀԿ ղեկավարությունը ցանկանում է կուսակցության վերնախավում հեղափոխական սերնդափոխություն իրականացնել, և 2017թ. խորհրդարանական ընտրություններին ներկայանալ նոր և ավելի երիտասարդ դեմքով: Հատկապես գործարար թևին զգուշացվել է, որ իրենք նոր խորհրդարանում չեն լինելու, և որպեսզի իրենց «քցված» չզգան, առաջարկվել է իրենց համար փոխարինողներ գտնել, որոնք կլինեն քիչ թե շատ կիրթ և քաղաքականապես ավելի գրագետ:
Դեռևս 2012թ. խորհրդարանական ընտրությունների ժամանակ իշխանությունը ցանկություն ուներ խորհրդարան չբերել գործարարների, որոնք իրենց միակ պարտքն են համարում խմբակցության ղեկավարի ազդանշանով սեղմել կողմ կամ դեմ կոճակները, բայց բացարձակ անտարբեր են խորհրդարանում քննարկվող հարցերի նկատմամաբ, և չեն կարող որևէ կապակցված միտք արտահայտել դրանց վերաբերյալ: Բայց այն ժամանակ իշխանությունը չցանկացավ նեղացնել գործարարներին, որովհետև խորհրդարանական ընտրություններից ընդամենը 7-8 ամիս հետո տեղի էին ունենալու նախագահական ընտրություններ, և այդ մարդիկ իրենց «քցված» զգալով կարող էին պասիվություն դրսևորել նախագահական ընտրությունների ժամանակ:
Հիմա իրավիճակը բոլորովին այլ է, նոր Սահմանադրությամբ այլևս նախագահական ընտրություններ չեն լինելու, և հետևաբար խնդիր չկա մտածելու, թե ինչպիսին կլինի գործարարների դիրքորոշումն ընտրություններից հետո: Իշխանությունը հիմա էլ ունի այդ մարդկանց աջակցության կարիքը տեղերում, և նրանց ասված է, որ իրենց «քցելու» խնդիր դրված չէ: Ուղղակի խորհրդարանում պետք է լինեն մարդիկ, որոնք կարող են զբաղվել օրենսդրական աշխատանքով, որոնք ունեն կրթություն և քննարկվող հարցերի վերաբերյալ կարող են սեփական կարծիք արտահայտել ու պաշտպանել իշխանության դիրքորոշումը: Գործարար պատգամավորներին ասվել է, որ եթե իրենք իրենց շրջապատում ունեն այդպիսի մարդիկ, որոնց կարող են գործուղել խորհրդարան, ապա իշխանությունը պատրաստ է քննարկել նաև նրանց թեկնածությունը:
Մեր տեղեկություններ ՀՀԿ-ական գործարար պատգամավորների մեծամասնությունը դժվարությամբ, բայց կամաց-կամաց սկսում են համակերպվել այդ գաղափարի հետ: Կան այնպիսինները, որոնք ասում են, որ նույն բանն իրենց ասվում էր 2012թ. ընտրություններից առաջ, բայց հետո որոշումը փոխվեց, և հիմա էլ չի բացառվում, որ հնարավոր լինի մտնել ցուցակ: Բայց մյուս մասը ասում է, որ իրենք ևս հոգնել են պարտադրանքով խորհրդարան ներկայանալուց, զզվում են, երբ ամեն քվեարկությունից առաջ իրենց զանգում և պարտադրում են ներկա գտնվել նիստերի դահլիճում, կամ այդ քվեարկություններից չբացակայելու համար ստիպված են լինում հրաժարվել արտասահմանյան ուղևորություններից: Նրանք ասում են, որ եթե իշխանությունն իրենց փոխարեն խորհրդարան անցկացնի իրենց տղաներին, կամ այլ ազգականների, ապա իրենք դեմ չեն լինի այդ տարբերակին:
Մեր տեղեկություններով՝ առաջինը պատգամավորական մանդատից հոգուտ եղբորորդու հրաժարվելու պատրաստակամություն է հայտնել Սամվել Ալեքսանյանը: Ասում են, Ալեքսանյանի եղբորորդին Բրիտանիայում է կրթություն ստացել, և պատգամավորի ավելի լավ թեկնածու է, քան ինքը Ալեքսանյանը:
Մյուս պատգամավորներն իրենց շրջապատում փնտրում են կրթություն ստացած մարդկանց, որովհետև իշխանությունը պահանջել է, որ թեկնածուն ոչ միայն երիտասարդ, այլ նաև որոշակի կրթական և մասնագիտական ցենզ ունենա: Խորհրդարանից դուրս մնացած պատգամավորներին խոստացել են չնեղացնել նաև այն դեպքում, եթե նրանց թեկնածուն պատգամավոր չդառնա: Այդ դեպքում նրանք կամ նրանց ներկայացուցիչներն աշխատանք կստանան գործադիրում: Իշխանությունն ուզում է արմատապես փոխել նոր խորհրդարանի կազմը, բայց ուզում է, որ դա լինի հնարավորինս անցնցում, և առանց լուրջ դիմադրության: