Իշխող Հանրապետական կուսակցության և Հայ Յեղափոխական Դաշնակցության միջև կոալիցիա կազմելու շուրջ բանակցությունները շարունակվում են։ Առաջիկայում հայտնի կդառնա, թե կոալիցիա կազմելու դիմաց քանի նախարարի և քանի մարզպետի պորտֆել կստանա Դաշնակցությունը։
Քաղտեխնոլոգ Կարեն Քոչարյանի խոսքով՝ Դաշնակցությանն այս գործակցությունը պետք է ընտրությունների և մյուս հնգամյակի համար։ Իսկ թե ինչու է կոալիցիան պետք Հանրապետական կուսակցությանը՝ Քոչարյանը մի քանի գործոն է մատնանշում։
Մամուլը վերջին շրջանում գրում էր նաև, թե նախքան 2017 թվականի ընտրությունները Հանրապետական կուսակցության հետ կոալիցիա կարող է կազմել նաև «Բարգավաճ Հայաստան» կուսակցությունը: Երեկ, սակայն, ԲՀԿ նախագահ Նաիրա Զոհրաբյանը հայտարարեց որ իրենց օրակարգում կոալիցիա կազմելու թեման փակված է։
Կարեն Քոչարյանն ընդգծում է՝ ԲՀԿ-ի ազդեցությունը սփյուռքի վրա զրոյական է, իսկ արտաքին գործոններում փետրվարի 12-ից հետո կուսակցության ազդեցությունը վերացել է, նա արտաքին որևէ լծակ չունի:
Այսօրվա դրությամբ, ըստ քաղտեխնոլոգի, չկա որևէ կուսակցություն, որը 2017 թվականին կարող է հատել 5 տոկոսի սահմանը՝ բացառությամբ ՀՀԿ-ի, որը կհատի այդ սահմանն իր ռեսուրսի հաշվին։
Վերլուծաբան Արծրուն Պեպանյանն իր հերթին նշում է, որ իշխող կուսակցությունը կոալիցիա հրավիրելուց առաջ հստակ հաշվարկ է կատարել՝ պորտֆելներ զիջելու դիմաց ինքն ինչ է շահելու։ Հաշվարկներ կատարելուց հետո որոշել է նաև, թե կոնկրետ որ կուսակցությանն առաջակել՝ ՀՅԴ-ի՞ն, թե՞ ԲՀԿ-ին:
Վերջին 8 տարվա ընթացքում հանրապետականները ստիպված էին մղել պաշտպանական մարտեր՝ վախենալով, որ ընդդիմությունը ժողովրդական ընդվզումով կարող է իշխանություն վերցնել, հարկադրված էին զգուշանալ հնարավոր ներիշխանական դավերից: