Հյուսիսային Կորեայի ռազմածովային ուժերի պարեկային մոտորանավակը հատել է Դեղին ծովում ջրային սահմանը և մտել հարավկորեական ջրային տարածք։ Այս մասին հայտնում է Reuters-ը՝ հղում անելով Հարավային Կորեայի ազգային պաշտպանության նախարարության ներկայացուցչին։
«Հյուսիսային Կորեայի ռազմական մոտորանավակը հատել է Հյուսիսային սահմանազատիչ գիծը»,- ասել է նա։
Նրա խոսքով՝ մոտորանավակը վերադարձել է հյուսիսկորեական ջրեր իր ուղղությամբ արձակված մի քանի նախազգուշական կրակոցներից հետո։
Ավելի վաղ հաղորդվել էր, որ Հարավային Կորեայի ջրերում է հայտնվել հյուսիսկորեական հրթիռի բեկոր։
Հյուսիսային սահմանազատիչ գիծը երկու Կորեաների միջև փաստացի ծովային սահման է։ Փխենյանը չի ճանաչում այն՝ պնդելով, որ սահմանը պետք է անցնի ավելի հարավ ընկած տարածքով։