Արարատի և Վայոց Ձորի մարզերի ընդհանուր իրավասության դատարանում Գագիկ Սարգսյանի նախագահությամբ ավարտվել է Սեդրակ Ջաբրիելյանի գործի դատական քննությունը:
26-ամյա Սեդրակի խնամքին 2 անչափահաս երեխաներ կան:
Գործի քննությամբ հաստատվել է, որ Արտաշատ քաղաքում գտնվող հայրական տան իր բաժնեմասում Սեդրակն ապրել է կնոջ ու երկու երեխաների հետ:
Տան իրենց բաժնեմասն ունեն նաև Սեդրակի մայրը, հայրը, եղբայրն ու քույրերը:
Սեդրակի հետ լարված հարաբերություններ ունենալու պատճառով մայրը դստեր ու նրա երեխայի հետ մի քանի ամիս բնակվել է այլ հասցեում: Սեդրակի մայրը վատառողջ է եղել, բուժվել է հիվանդանոցում:
Հիվանդանոցից դուրս գրվելուց հետո՝ 2014 թվականի սեպտեմբերի 9-ին, Սեդրակի մայրն ու քույրը վերադարձել են ընդհանուր հայրական տուն:
Ժամը 20-ն անց 30-ի սահմաններում Սեդրակը տան կոմունալ հարմարություններից՝ լույսից, գազից օգտվելու պատճառով վիճել է քրոջ ու մոր հետ: Վեճի ժամանակ Սեդրակը, ըստ դատական ակտի, ծեծել է քրոջը՝ ձեռքով հարվածել է նրա ծոծրակին, գցել է գետնին, մի անգամ էլ հարվածել է նրա ձախ ականջին, ինչպես նաև պատճառել է առողջության թեթև վնասի հատկանիշներ չպարունակող վնասվածքներ՝ արյունազեղումներ նախաբազկի, ազդրի շրջաններում, քերծվածքներ:
Սեդրակի մայրը փորձել է միջամտել զավակների վիճաբանությանը, բայց Սեդրակը բռունցքով հարվածել է մոր կրծքին: Այդ հարվածի մասով Սեդրակի նկատմամբ քրեական հետապնդում որոշվել է չիրականացնել:
Սեդրակ Ջաբրիելյանին մեղադրանք է առաջադրվել քրոջ նկատմամբ բռնություն գործադրելու համար՝ ՀՀ քրեական օրենսգրքի 118 հոդվածով:
Սեդրակն իրեն մեղավոր չի ճանաչել: Նա հայտնել է, որ գույքային հարցերի հետ կապված՝ իր ու մոր հարաբերությունները խիստ լարված են:
Սեդրակն ընդունել է, որ ինքն արգելել է իր մորն ու քրոջը՝ օգտվել գազօջախից ու լույսից՝ պատճառաբանելով, թե նրանք չեն վճարել իրենց ծախսած գազի ու լույսի համար…
Այդ հարցով իրենց մեջ անընդհատ վեճ ու խոսակցություն է եղել, բայց, ըստ Սեդրակի, ինքը քրոջը չի հարվածել, ծեծի չի ենթարկել, մորը նույնպես չի խփել: Մայրն ու քույրը իրեն զրպարտել են…
Տուժող քույրը հայտնել է, թե ինքը մոր ու անչափահաս որդու հետ ապրել է իրենց խանութ-կրպակի երկրորդ հարկում գտնվող սենյակում, բայց իրենք հաշվառված են հայրական տանը:
Մոր ու եղբոր հարաբերությունները խիստ լարվել են՝ կապված մորը պատկանող գույքը ամբողջությամբ եղբորը տրամադրելու պահանջի հետ: Դեպքից առաջ մի քանի ամիս մայրն իր հետ բնակվել է իր սենյակում: Հետո մայրը հիվանդացել է, քսան օր պառկել է հիվանդանոցում: Երբ դուրս է գրվել, ինքը մոր ու որդու հետ գնացել է հայրական տուն:
Երբ ցանկացել է գազօջախի վրա մոր համար կերակուր տաքացնել, եղբայրը չի թողել, կոմունալ հարմարություններից օգտվելու հարցի հետ կապված՝ վիճել է իր հետ ու ծեծել է… Մայրը փորձել է մեջտեղ ընկնել, բայց եղբայրը բռունցքով խփել է մոր կրծքին…
Սեդրակի մայրը հայտնել է, թե ինքը 2011 թվականին ամուսնալուծվել է ու բնակվել է որդու և նրա ընտանիքի հետ: Ամուսնալուծությունից հետո ինքը դիմել է դատարան՝ իր և ամուսնու համատեղ սեփականությունը բաժանելու հարցով:
Դատարանի վճռով վիճելի տունը բաժանվել է իր, ամուսնու և իրենց չորս երեխաների միջև, յուրաքանչյուրը ստացել է տան մեկ յոթերորդ մասը:
2014 թվականի մարտ-ապրիլ ամիսներին իր և որդու՝ Սեդրակի հարաբերությունները լարվել են՝ կապված ունեցվածքն ամբողջությամբ իրեն տրամադրելու՝ Սեդրակի պահանջի հետ: Ապրիլի 18-ին Սեդրակը վիճել է իր հետ, ինքը տանից փախել, մի քանի ամիս ապրել է դստեր ու նրա երեխայի հետ՝ իրենց խանութի երկրորդ հարկում գտնվող սենյակում:
Հետո հիվանդացել, պառկել է հիվանդանոցում, իսկ երբ դուրս է գրվել, դստեր հետ վերադարձել է տուն: Բայց որդին վիճել է քրոջ հետ, չի թողել, որ նա գազօջախից ու լույսից օգտվի, ծեծել է նրան, հարվածել է նաև իրեն…
Ընդհանուր իրավասության դատարանը Սեդրակ Ջաբրիելյանին մեղավոր է ճանաչել ՀՀ քրեական օրենսգրքի 118 հոդվածով և դատապարտել է 70 հազար դրամի տուգանքի:
