Հալեպի սենդվիչներն ու արևելյան համեմունքները, ինչպես նաև վարսավիրի հմտությունները սիրիական պատերազմի պատճառով մեր՝ առավելապես հալեպահայ հայրենակիցների շնորհիվ մի քանի տարի է՝ հասել են Հայաստան՝ Երևան:
Պարոն Վահրամը տարիուկես է՝ ընտանիքով տեղափոխվել է Հայաստան և արդեն մեկ տարի է, ինչ վարձակալել է այս կրպակը: Նա պատրաստում ու վաճառում է Հալեպի սենդվիչներ:
Հալեպի սենդվիչներ պատրաստող պապիկը Հալեպում նույն գործով է զբաղվել: Նրա խոսքով՝ նա այստեղ այնքան գումար է վաստակում, որքան այնտեղ, բայց Հայաստանում այդ գումարով դժվարանում է ապրել:
Մի քանի քայլ այն կողմ համեմունքների աշխարհն է:
Սարգիսն իր ընտանիքի հետ 2012 թվականին է ժամանել Հայաստան՝ սկզբում զբոսաշրջության նպատակով, ապա որոշել է մշտական բնակություն հաստատել հայրենիքում:
Իրենց ապրուստը Սարգիսը համարում է «ծայրը ծայրին հասցնել»: Նա ոչ ուրիշների մոտ աշխատելուց է գոհ, ոչ սեփական գործից;
Սարգիսի կրպակի կողքին Գևորգի վարսավիրանոցն է: Արդեն 3 տարի է՝ նա Հայաստանում է: Սկզբում ապրել է Էջմիածնում, այժմ տեղափոխվել է Երևան ու իր անձնական գործն է սկսել:
2012 թվականից մինչև այսօր Հայաստանում գրանցվել է սիրիահայերի 75 նոր բիզնես, հիմնվել է 112 աշխատատեղ, որոնց 90 տոկոսը՝ Հայաստան ժամանած սիրիահայերի համար։