Սիսակյան 3 հասցեում գտնվող 4-րդ կարգի վթարայնության կիսաքանդ հանրակացարանային շենքում ապրողներ կան՝ չնայած այս շենքի վերաբնակեցումը սկսվել է դեռևս 2013 թվականից: Տարածքային կառավարման և արտակարգ իրավիճակների նախարարության գնահատմամբ՝ այս շենքում ապրելը գերվտանգավոր է, բայց 8 ընտանիք տարածքը լքելու միտք չունի:
Իռա Սարդարյանը 20 տարի է՝ բնակվում է այս հանրակացարանում: Նա 92թ. խորհրդային զինվորների օգնությամբ Ադրբեջանի կողմից գրավված Գետաշենից մազապուրծ հասել է Երևան, ու որպես փախստական՝ այստեղ նրան հատկացվել է երկուսենյականոց բնակարան, թեև քաղաքապետարանը միայն մեկ սենյակն է բնակելի համարում:
Երևանի քաղաքապետի տեղակալ Վահե Նիկոյանը 9 հոգանոց ընտանիքին տեղավորելու մասին հարցին պատասխանում է. «Սա բնակարանային բարելավման ծրագիր չէ, սա վթարային շենքերի վերաբնակեցում է, իրենց երկու սենյակն իրար հետ քմ-ով ավելի փոքր է, քան քաղաքապետարանի հատկացրած մեկսենյականոց բնակարանը»:
Այստեղ ապրող 8 ընտանիքները պնդում են, որ քաղաքապետարանը շենքի բնակիչներին տարածքներ հատկացնելու հարցում խախտումներ է կատարել:
Այս շենքում բնակվող 8 ընտանիքը որոշել է մինչև վերջ պայքարել, իրենց համոզմամբ՝ իրենց հասանելիք տարածքների համար:
Սիսակյան 3 հասցեում ապրող 112 ընտանիք վերաբնակեցված է, մնացած 8 ընտանիքների համար պարոն Նիկոյանն առաջարկում է դիմել դատարան՝ խոստանալով, որ եթե դատարանը որոշում կայացնի նրանց օգտին, քաղաքապետարանը որոշումը չի բողոքարկի:
