Ադրբեջանական Turan լրատվական գործակալության փոխանցմամբ՝ Տալե Բագիրովի (Բագիրզադե) ու «Մուսուլմանական միասնություն» շարժման անդամների դեմ հարուցված քրեական գործի շրջանակներում կալանավորվել է 57 մարդ։ Եվս 11 մարդ կալանավորվել է Գյանջայում (Գանձակ) ու մյուս շրջաններում։
Այդ մասին փետրվարի 5-ին դատախազության կոլեգիայի ընդլայնված նիստում, որը նվիրված է եղել 2015 թվականի արդյունքների ամփոփմանը, հայտարարել է գլխավոր դատախազ Զաքիր Գարալովը։ Նրա խոսքերով՝ «Մուսուլմանական միասնություն» շարժման անդամների մոտ հայտնաբերվել և առգրավվել է մեծ քանակությամբ հրաձգային զենք, զինամթերք, արմատական բովանդակությամբ կրոնական գրականություն։
Բագիրզադեն ձերբակալվել է նոյեմբերի 26-ին Նարդարան ավանում իրականացված հատուկ գործողության ժամանակ, որի արդյունքում զոհվել է 6 մարդ, այդ թվում՝ նաև 2 ոստիկան։
Գարալովը հայտարարել է, որ հետաքննությունը շարունակվում է նաև Կասպից ծովի ադրբեջանական հատվածում գտնվող «Գյունշելի» հանքավայրում ու Բաքվի բարձրահարկ շենքերից մեկում բռնկված հրդեհների գործերով, որոնք հանգեցրել են մեծ թվով զոհերի։
