Թուրքական Anadolu լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն Աստանայում հանդիպել է Ղազախստանի նախագահ Նուրսուլթան Նազարբաևի հետ։ Հանդիպման հիմնական մասը Ղազախստանի նախագահի նստավայրում անցել է տետ-ա-տետ պայմաններում և տևել է 2 ժամ 40 րոպե։
Դավութօղլուն ընդգծել է, որ Ղազախստան կատարած յուրաքանչյուր այցի ընթացքում իրեն զգում է ինչպես հայրենիքում։ Դավութօղլուն հայտարարել է, որ հպարտ է Թուրքիայի վարչապետի կարգավիճակով առաջին անգամ Ղազախստան այցելելու կապակցությամբ՝ հիշեցնելով, որ Թուրքիայի արտգործնախարարի կարգավիճակով բազմիցս այցելել է Ղազախստան։
Նա միաժամանակ նկատել է, որ հանդիսանում է ընթացիկ տարում Թուրքիայից Ղազախստան այցելած առաջին պաշտոնատար անձը. «Ղազախստանի անկախության 25-ամյակը մեզ համար նույնպես հպարտության պատճառ է։ Ձեր՝ որպես աքսակալի (սպիտակամորուս) գլխավորությամբ Ղազախստանի յուրաքանչյուր ձեռքբերում մենք համարում ենք մեր ձեռքբերումը»։
Դավութօղլուն Նազարբաևին հիշեցրել է Թուրքիայի 8-րդ նախագահ Թուրգութ Օզալի խոսքերը, ով ժամանակին Ղազախստանից Թուրքիա ապօրինի ներգաղթյալների թվակազմի վերաբերյալ հայտարարել էր. «70 միլիոն՝ ներառյալ ես». «Մենք ոչ վաղ անցյալում հաշվարկել ենք Թուրքիայի բնակչության թիվը, և կարող եմ ձեզ վստահեցնել, որ այսօր իմ երկրում ապրում է 78.6 միլիոն ղազախ, որոնց անունից էլ ողջունում եմ ձեզ»։
Դավութօղլուն կարևորել է բոլոր ուղղություններով Թուրքիայի ու Ղազախստանի միջև կապերի խորացումը՝ ընդգծելով, որ մեծ պոտենցիալ կա հատկապես տրանսպորտի, էներգետիկ ու առևտրի ոլորտներում. «Ազատ առևտրի մասին համաձայնագրի շնորհիվ էլ ավելի կաճի մեր երկրների միջև ապրանքաշրջանառության մակարդակը։ Թուրքիան Ղազախստանի համար դուռ է դեպի ԵՄ, իսկ Ղազախստանը Թուրքիայի համար դուռ է դեպի ԵՏՄ։ Միջին տրանսպորտային միջանցքի ներդրման շնորհիվ Թուրքիան ու Ղազախստանը կստանան Եվրասիայի կենտրոնների կարգավիճակ»։