Սաուդյան Արաբիան և նրա դաշնակից արաբական երկրները մինչև 150.000 զինծառայող են պատրաստում Սիրիայում ԴԱԻՇ-ի դեմ հնարավոր գործողության համար: Այս մասին վկայում են CNN հեռուստաալիքի աղբյուրները:
Ինչպես հեռուստաալիքին ասել են աղբյուրները թագավորությունում՝ պատրաստության ծրագրերն իրականացվում են նրա տարածքում, դրանց մասնակցում են սաուդցի, եգիպտացի, սուդանցի և հորդանանցի զինվորականներ:
Սաուդյան Արաբիայի պաշտպանության նախարարի խորհրդական Ահմեդ Ասիրին հինգշաբթի հայտարարել է, որ երկիրը պատրաստ է զորքեր ուղարկել Սիրիայում ցամաքային գործողությանը մասնակցության համար՝ պայմանով, որ այն համաձայնեցնի ԱՄՆ-ի գլխավորությամբ միջազգային կոալիցիայի հրամանատարությունը: Նա հայտնել է, որ այդպիսի որոշում ենթադրաբար կարող է ընդունվել հաջորդ շաբաթ Բրյուսելում ՆԱՏՕ-ի գագաթնաժողովում:
ԱՄՆ պաշտպանության նախարար Էշթոն Քարթերը հաստատել է, որ ՆԱՏՕ-ի գագաթնաժողովում Սաուդյան Արաբայի ներկայացուցիչների հետ կքննարկի նրա նախաձեռնությունը:
