Բրիտանացի աստղագետներն ապացուցել են, որ Տուկան համաստեղությունում գտնվող մոլորակը, որը մի ժամանակ «վտարանդի» է համարվել, իրականում կարմիր գաճաճի ուղեկիցն է՝ չնայած դրա շուրջ պտտվում է ռեկորդային մեծ հեռավորությամբ: Գիտնականների նախնական հաշվարկներով՝ վտարանդին «տնային» աստղից հեռու է մոտ 1 տրլն կմ-ով, հայտնում է ageofcomp.info-ն:
Բացահայտման հեղինակը Նայալ Դիքոնն է Հարթֆորդշիրի համալսարանից, որը համոզված է, որ դա մեծ և «ընդարձակ» մոլորակային համակարգ է: Ընդ որում՝ դրա «բնակիչները» աստղագետներին հայտնի են ավելի քան 8 տարի: Չնայած դրան՝ նախկինում ոչ ոքի մտքով չի անցել կապ փնտրել նրանց միջև: Բանն այն է, որ 2MASS J2126−8140 մոլորակն այնքան միայնակ չէ, որքան գիտնականները կարծում էին նախկինում, թեև այն շատ հեռու է իր աստղից: