ՊՍԺ-ի կիսապաշտպան Անխել Դի Մարիան ցանկանում է ջնջել հիշողությունից կարիերայի այն հատվածը, երբ հանդես է եկել «Մանչեսթեր Յունայթեդ»-ում:
27-ամյա ֆուտբոլիստը «Ռեալ»-ից «Մանչեսթեր Յունայթեդ» է տեղափոխվել 2014 թվականի ամռանը 59,7 մլն ֆունտի դիմաց: Սակայն Դի Մարիան այդպես էլ չկարողացավ հարմարվել «կարմիր սատանաներ»-ի թիմում:
Անգլիայի Պրեմիեր լիգայի մեկ մրցաշրջանում անցկացնելով 27 հանդիպում, Դի Մարիան հեռացել է «Օլդ Թրաֆորդ»-ից և տեղափոխվել Ֆրանսիա: Արգենտինացի ֆուտբոլիստը չի ափսոսում իր որոշման համար:
««Մանչեսթեր Յունայթեդ»-ը դառը փորձ էր: Ամեն ինչ չէր ընթանում այնպես, ինչպես հույս ունեի: Հիասթափված էի, ինչի պատճառով էլ չէի կարողանում վերադարձնել լավագույն խաղային որակներս: Անկեղծ ասեմ, անգամ չեմ ցանկանում հիշել, թե ինչ էր կատարվում:
Այժմ խաղում եմ ՊՍԺ-ում: Դա է կարևորը: Օրեցօր այստեղ ինձ ավելի լավ եմ զգում: Անշուշտ, դա կանդրադառնա իմ խաղի վրա: Ցանկանում եմ ջնջել իմ հիշողությունից «Յունայթեդ»-ում անցկացրած օրերը»,- L’Equipe-ը մեջբերում է Դի Մարիայի խոսքերը: