Ադրբեջանն իր հերթական դժգոհությունն է հայտնել ԵԱՀԿ Մինսկի խմբի համանախագահների գործունեությունից՝ այս անգամ բողոքի նամակներ ուղարկելով համանախագահող երկրներ։ Դժգոհության պատճառն այս անգամ Մինսկի խմբի համանախագահների հայտարարությունն ու կոչն էր՝ ուղղված ԵԽԽՎ-ին հակահայկական զեկույցների քննարկումից առաջ։
Ադրբեջանի արտաքին գործերի նախարար Էլմար Մամեդյարովը հայտարարել է, որ բողոքի նամակներ է ուղարկել համանախագահ երկրների արտգործնախարարություններ, որոնցում նշել է, որ Լեռնային Ղարաբաղի հետ կապված ցանկացած հարցի հրատապություն հաղորդելը իրենց անձնական գործն է: Ոչ ոք չի կարող խառնվել դրան: Նրանք չեն կարող ճնշում գործադրել եվրոպացի խորհրդարանականների վրա:
Քաղաքագետ, Կովկասի ինստիտուտի փոխտնօրեն Սերգեյ Մինասյանի կարծիքով՝ վտանգ կա, որ Ադրբեջանը կարող է առհասարակ դուրս գալ Մինսկի խմբի ձևաչափից:
Փորձագետ Ստյոպա Սաֆարյանն իր հերթին նշում է, որ Ռոբերտ Ուոլթերի հեղինակած զեկույցի տապալումը իրական հիստերիա է առաջացրել Ադրբեջանում, և դա նկատելի է հիմնականում այն ԶԼՄ-ների կողմից, որոնք սնվում են Ալիևի վարչակազմից:
Մամեդյարովը երեկ նշել է նաև, թե որևէ նորություն չկա համանախագահների հետ հնարավոր հանդիպումների վերաբերյալ: «Այն բանից հետո, որ նրանք նամակ ուղարկեցին Ստրասբուրգ, չեմ կարծում, թե հանդիպում հնարավոր է»:
Օրեր առաջ հայտնի դարձավ, որ Հայաստանի և Արբեջանի նախագահների միջև հնարավոր է հանդիպում Վաշինգտոնում՝ միջուկային անվտանգության համաժողովին։ Սերգեյ Մինասյանի խոսքերով՝ եթե չլինի Սարգսյան-Ալիև երկկողմ հանդիպում, մեր մասնակցությունը այդ համաժողովին և հանդիպումը Օլանդի և Օբամայի հետ ինքնին արդեն դրական հանգամանք է:
Ստյոպա Սաֆարյանն իր հերթին նշում է, որ նման միտումների շարունակման դեպքում Արևմուտքը կարող է անգամ քաղաքական որոշում ընդունել Իլհամ Ալիևի իշխանությունը վերջնականապես տապալելու համար։ Նա այլևս դուրս է կառուցողական բոլոր հնարավոր պատկերացումներից և վտանգի տակ է դնում այն ամենը, ինչ արվել է տասնամյակների ընթացքում: