ԵԽԽՎ-ում հակահայկական զեկույցներից մեկի՝ Ռոբերտ Ուոլթերի զեկույցի ընդունման կանխումը իսկական հիստերիա է առաջացրել Ադրբեջանում, իսկ այդ երկրի արտգործնախարարը հայտարարել է, որ բողոքի նոտա է հղելու Մինսկի խմբի համանախագահող երկրներին՝ բացառելով համանախագահների հետ հանդիպումը:
Այս առնչությամբ միջազգայնագետ Աղասի Ենոքյանը «Առաջին լրատվական»-ի հետ զրույցում կարծիք հայտնեց, որ ԵԽԽՎ-ին ուղղված ԵԱՀԿ Մինսկի խմբի կոչը Ադրբեջանի համար պարզապես առիթ էր, իսկ պատճառներն այլ էին. «Կարծում եմ, որ պատճառների թվում են այն բազմաթիվ հայտարարությունները, որ միջազգային տարբեր ատյաններում ընդունվում են Ադրբեջանի դեմ»:
Նրա խոսքով՝ Ադրբեջանում մյուս կարևոր գործոնները իսլամի զարթոնքն ու սոցիալական բունտերն են. «Եվ այս ամենի հետևում կա մեկ կարևոր գործոն՝ նավթի գների անկումը»:
Ինչպես նշեց միջազգայնագետը՝ Ալիևը փորձում է այս խնդիրների լուծումը տեսնել Ղարաբաղում և քննադատում է համանախագահներին: Մեր զրուցակիցը չի բացառում նաև Ալիևի այն մոտիվացիան, որ նա կարող է տնտեսությունը փրկելու համար առևտրի մեջ մտնել տարբեր ֆինանսական դոնորների հետ՝ նրանցից ավելի շատ գումար վերցնելու համար. «Ուստի կարծում եմ, որ Մինսկի խմբին ուղղված այս մարտական կոչերը թատերականացված ներկայացում են: Իսկ Մինսկի խմբի ֆորմատից Ադրբեջանը կհրաժարվի միայն այն դեպքում, եթե պատրաստ լինի պատերազմի»:
Աղասի Ենոքյանը շատ հավանական է համարում Վաշինգտոնում տեղի ունենալիք գագաթնաժողովին Ալիև-Սարգսյան հանդիպումը. «Ալիևին հրավիրել են Վաշինգտոն՝ մշակելու, և չի կարողանա հրաժարվել Սերժ Սարգսյանի հետ հանդիպումից, որովհետև, այնուամենայնիվ, Ադրբեջանը փողի է սպասում, իսկ դա չի կարող տրվել առանց նախապայմանների»: