Գյումրիում տեղակայված ռուսական 102-րդ ռազմաբազայում այսօր շարունակվեց Ավետիսյանների սպանության մասով դատաքննությունը։
Հարցաքննության հրավիրվեց գործով վկա Միխայիլ Խաչատրյանը։ Վերջինս Գյումրիում տեղակայված 102-րդ ռազմաբազայի սահմանապահ ջոկատի աշխատակից, «Բայանդուր 2» ուղեկալի նախկին պետն է:
Վկան պատմեց, որ հունվարի 12-ի ուշ երեկոյան սահմանային ուղեկալում հայտնաբերել և ձերբակալել է Վալերի Պերմյակովին։ Անմիջապես հարց է ուղել՝ դո՞ւ ես կատարել հանցագործությունը, որին ի պատասխան Պերմյակովն արձագանքել է. «Ոչ, ես ոչինչ չեմ արել»։
Մանրամասնելով կատարվածը վկան նշեց՝ զորամասի հրամանատարությունը հրաման է արձակել, որպեսզի շտապ մեկնի ծառայության, քանի որ պահակակետից զինծառայող է փախել: Եկել է զորամաս ու ավագ սերժանտի հետ միասին աշխատանքի անցել: Հատուկ վարժեցված շան հետ ինքն ու ավագ սերժանտը մեկնել են Պերմյակովի հետքերով՝ Մյասնիկյան 188 տուն, ուսումնասիրել տարածքը, մոտ 200 մետր գնացել ու կորցրել հետքը։
«Դրանից հետո հրամանատարի հրամանով գնացի սահմանային ուղեկալ: Երբ եկանք ծառայության վայրը, տեսանք պոմպային մասում լապտերի լույսը: Նկատեցի, որ ինչ-որ մեկը լապտերի լույս է գցել, ես տեսա և զորամասի հրամանատարին ասացի այդ մասին: Տվյալ լապտերի լույսը մոտենում էր մեզ, թույլ տվեցինք, որ անծանոթը մոտենա, որ կարողանանք ձերբակալենք, կանչեցինք, անծանոթը պատասխանեց՝ ձերոնցից եմ, այդ ժամանակ ես հասկացա, որ երևի թե դա փնտրվող անձն է»,- պատմեց Խաչատրյանը։
Տուժողի իրավահաջորդի ներկայացուցիչ Լուսինե Սահակյանը վկայի՝ դատարանում տված ցուցմունքի ու նախաքննական ցուցմունքի միջև նկատեց անհամապատասխանություն: Մասնավորապես այն, որ նախաքննության ընթացքում վկա սահմանապահը հայ քննիչներին չի պատմել, որ գիշերը փորձել են փնտրել Վ.Պերմյակովին:
Վկա Խաչատրյանը հակադարձեց՝ որ ռուս քննիչներին մանրամասն պատմել է ամեն բան, իսկ հայ քննիչներն իրեն այդ մասին չեն հարցրել: Բացի այդ, Միխայիլ Խաչատրյանը նախաքննության ընթացքում հայտնել է, որ միայն առավոտյան է իմացել, որ Պերմյակովը հենակետից զենքով փախել է, այնինչ դատարանում հայտնեց, որ գիշերն անգամ փնտրել են ամբաստանյալին:
Հարցաքննվող վկային մի քանի հարցեր ուղղեց նաև տուժող Եգոր Ադամյանի ներկայացուցիչ՝ փաստաբան Երեմ Սարգսյանը: Նա հետաքրքրվեց, թե Պերմյակովին հայտնաբերելուց հետո հարցրել են արդյոք նրան, թե ինչպես է հասել հայ-թուրքական սահմանի մոտ: Վկան պատասխանեց, որ հետաքրքրվել են, սակայն Պերմյակովն ասել է, որ ոչինչ չգիտի:
Հարցաքննվեց վկա, սահմանապահ ջոկատի ծառայող Գագիկ Խաչատրյանը։ Նա պատմեց, որ սահմանի ապօրինի հատման ահազանգ է ստացել, գնացել է դեպքի վայր ու տեսել, որ իր ծառայակիցները սահմանախախտին արդեն ձերբակալել են։
Այսօրվա դատական նիստի ընթացքում հարցաքննվեց նաև սահմանամերձ Երազգաորս գյուղի բնակիչը, որը պատմեց՝ մեքենաների շարժ է նկատել, դուրս է եկել, ասել են, որ զինվոր է փախել։ Ալեքսանյանը տեսել է, թե ինչպես են փախած զինվորին մեքենայով տանում։