«Նոր Հայաստան» հանրային փրկության ճակատը մարտի մեկին նախատեսում է հանրահավաք անցկացնել Ազատության հրապարակում․ նախաձեռնությունը կոչ է անում աշնանը նախագահական նստավայրում հայտնի ֆոտոսեսիային չմասնակցած բոլոր քաղաքկան ուժերին միավորվել և մեկ միասնական օրակարգով լինել Ազատության հրապարակում։ «Նոր Հայաստան»-ի պահանջները չորսն են՝ միջազգային պատժամիջոցների ենթարկել Մարտի 1-ի պատասխանատուներին, ազատ արձակել քաղբանտարկյալներին, հայտարարել համաներում բանտերի գերբեռնվածության հետևանքով բանտարկյալների փաստացի խոշտանգումը վերացնելու համար, ինչպես նաև կրճատել ոստիկանության զորքերի թիվը։
Հայտնի է, որ 2009 թվականից սկսած, ամեն տարի մարտի մեկին Հայ ազգային կոնգրեսն Ազատության հրապարակում հանրահավաք, այնուհետև երթ են անցկացնում դեպի Մյասնիկյանի հուշարձան։ «Նոր Հայաստան» հանրային փրկության ճակատի քաղխորհրդի անդամ Անդրիաս Ղուկասյանից հետաքրքվեցինք՝ արդյո՞ք ՀԱԿ-ի հետ կգան ընդհանուր հայտարարի մեկ միասնական հանրահավաք անցկացնելու և ժողովրդին այդ օրը չապակողմնորոշելու համար։
Անդրիաս Ղուկասյանն ընդգծեց՝ բանակցություններն այսօրվանից են մեկնարկել՝ հաջորդ շաբաթ դրանց արդյունքը պարզ կդառնա։
Քաղխորհրդի մեկ այլ անդամ՝ Հմայակ Հովհաննիսյանն ավելի լավատես է՝ մեր հարցին ի պատասխան նշեց՝ մարտի մեկի բացահայտման շահագրգիռ քաղաքական ուժերը՝ միասնական օրակարգով հանրահավաք չանցկացնելու տարբերակ չունեն։
Հայ ազգային կոնգրես կուսակցության փոխնախագահ Լևոն Զուրաբյանը չի հստակեցնում՝ կլինի միասնական հանրահավաք թե ոչ, միայն նշում է՝ոչ ոք մարտի մեկի բացահայտման հարցում չի եղել այնքան հետևողական, որքան Հայ ազգային կոնգրեսը։
Ի դեպ «Նոր Հայաստան» հանրային փրկության ճակատից հետաքրքրվեցինք՝ արդյո՞ք առաջիկայում իրենց հանրահավաքի օրակարգի և պահանջների վերաբերյալ քննարկումներ կանցկացնեն նաև մարտի մեկի զոհերի հարազատների հետ։
Մարտի մեկի զոհերից Գոռ Քլոյանի հայրը՝ Սարգիս Քլոյանը մեզ հետ հեռախոսազրույցում ասաց՝ մարտի մեկի տաս զոհերի ընտանիքներից միայն երեքն են Հայաստանում մնացել և նրանցից ոչ մեկի հետ քննարկումներ չեն եղել։ Սարգիս Քլոյանն ասում է՝ ամեն տարի Ազատության հրապարակում ինքն է ելույթ ունեցել, բայց այս անգամ ելույթով հանդես չի գալու։