Արագածոտնի մարզի Արագածավան համայնքում այս գիշեր հնչել են կրակոցներ, որոնց հետևանքով զոհվել են 40-ամյա Արտյոմ Խամոյանը և 49-ամյա Վարդգես Գալստյանը: Արտյոմ Խամոյանի եղբորորդին՝ 32-ամյա Արման Խամոյանը հրազենային վնասվածքով գտնվում է հիվանդանոցում: Տեղի ունեցած միջադեպի պատճառների և մանրամասների մասին գյուղացիները դժվարանում էին որևէ բան պատմել։
Ըստ գյուղում շրջանառվող լուրերի, սակայն, նախօրեին այրված խոտի դեզի պատճառով կողմերի միջև վիճաբանություն է ծագել, որը վերածվել է ծեծի,որի ընթացքում Սեդրակ Ղազարյանը մտել է տուն, վերցրել զենքը և կրակոցներ արձակել:
Հրազենից երեք վիրավորներին տեղափոխել են գյուղի ամբուլատորիա, որտեղ մեկի կյանքը չեն կարողացել փրկել։ Մյուս երկուսին տեղափոխել են Թալինի քաղաքային հիվանդանոց, որտեղ մահացել է Արտյոմ Խամոյանը: Ժամեր անց սկսվել է կողմերի հարազատների միջև հաշվեհարդարը: 8 ավտոմեքենա՝ բեռնատար և մարդատար, գրեթե ամբողջությամբ այրվել են, այրվել է նաև Խամոյանների անասնագոմը, հիմնահատակ ավերվել է գյուղի հացի փուռը:
Գյուղում կատարվածի առիթով հարուցվել է քրեական գործ՝ ՀՀ քր.օր 104 հոդվածի 2-րդ մասի և 235 հոդվածի 1-ին մասի հատկանիշներով: Այժմ ոստիկանները գյուղն առել են խստացված հսկողության տակ: Կատարվում է նախաքննություն: Գյուղապետ Անդրանիկ Պապիկյանը կատարվածի մասին իմացել է գիշերը: Հասել է տեղ, սկսել փրկարարներին օգնել:
Գյուղապետի խոսքերով՝ վիճողներն անասնապահներ են եղել: Թե ինչ ունեին իրար մեջ կիսելու, դժվարանում է ասել:
Գյուղում լարվածությունը դեռ շարունակվում է: Գյուղապետի խոսքերով՝ ամեն վայրկյան վրեժխնդրության վտանգ կա, որն իրենք փորձում են կանխել:
Դեպքի ժամանակ անհետացել է Սերյոժա Նազարեթյանի թոռը, որը ծերունու խոսքերով՝ իր կամքից անկախ է հայտնվել միջադեպի կիզակետում: Երեկ գիշերվանից նրան գտնել չի հաջողվում:
Թե որքան ժամանակ կպահանջվի, որ գյուղն ուշքի գա այս վիճակից, գյուղապետը դժվարանում է ասել:
Ոստիկանության տարածած հաղորդագրության համաձայն՝ գործի առթիվ բերման է ենթարկվել Արագածոտնի մարզի Արագածավան գյուղի բնակիչ, 35-ամյա Սեդրակ Հենրիկի Ղազարյանը: Վերջինս կասկածվում է նախօրեին իրեն պատկանող «ՖԱԲԱՐՄ» տիպի 12 տրամաչափի ողորկափող որսորդական հրացանով համագյուղացիներ՝ 40-ամյա Արտյոմ Սասունիկի Խամոյանին և 49-ամյա Վարդգես Հայկի Գալստյանին սպանելու մեջ: