Ավան և Նոր Նորք վարչական շրջանների ընդհանուր իրավասության դատարանում այսօր շարունակեց Վազգեն Սարգսյանի անվան ռազմական ինստիտուտում սպանված կուրսանտ Հայկազ Բարսեղյանի գործով դատական նիստը։ Նիստի սկզբում մեղադրյալների պաշտպանները դատարանին միջնորդեցին միմյանց միացնել և մեկ վարույթում քննել այս գործից անջատված երկու գործ։ Խոսքը, մասնավորապես, կուրսանտներ Կարեն Բաղրամյանի, Թելման Մխիթարյանի և Խաչիկ Մինասյանի քրեական գործերի մասին է։
Դատարանը, սակայն, համարեց, որ նշված միջնորդությունը չի կարող քննարկվել դատավարության այս փուլում, և շարունակեց նիստը, որի ժամանակ ուսումնասիրվեցին դեպքի վայրի ու դիակի դատաբժշկական ու դատափորձագիտական եզրակացությունները։
Դատական նիստի ավարտից հետո կուրսանտի հայրը «Առաջին լրատվական»-ի հետ զրույցում նշեց, որ հրապարակված փաստաթղթերից, հրապարակված ինֆորմացիայից հետո այլևս անհնար է պնդել, թե կատարվածը ինքնասպանություն է։
Այն, որ կատարվածը սպանություն է, համոզված է նաև այսօր դատական նիստին ներկա ԲՀԿ կուսակցության առաջնորդ Նաիրա Զոհրաբյանը։ Նա մեզ հետ զրույցում հայտարարեց, որ այս դեպքում պատրաստ է անգամ չպահել անմեղության կանխավարկածը և հայտարարել, որ տեղի է ունեցել դաժան սպանություն։
Նաիրա Զոհրաբյանը ուզում է հավատալ պաշտպանության նախարար Սեյրան Օհանյանի հավաստիացումներին, որ մինչև վերջին մեղավորը՝ լինի պաշտոնյա, թե շարքային կուրսանտ, պատասխանատվության կենթարկվեն։ Հակառակ դեպքում պատրաստ է հարցը բարձրացնել միջազգային բոլոր ատյանների առաջ։
