Դեպի Ռուսաստան հայկական պանրի արտահանման խնդրի մասին հայ արտադրողներն ու սպառողները տեղեկանում են ռուսական լրատվամիջոցների տարածած նորություններից, մասնավորապես՝ ԻՏԱՌ-ՏԱՍՍ-ից: Հայկական կողմը լուռ է: Սննդի անվտագության աշխատակիցը հեռախոսազրույցի ժամանակ խորհուրդ է տալիս կարդալ իր ֆեյսբուքյան գրառումը: Աբսուրդի շղթան այստեղ ընդհատելով՝ իրավիճակի վերաբերյալ տեղեկություն ենք փորձում ստանալ Պանրագործների միության նախագահ Արմեն Գիգոյանից: Պանրագործները նույնպես մեկնաբանության են սպասում:
Դաբաղի պատճառով Ռուսաստանի հավանական արգելքը եթե պահպանվի, իր բացասական անդրադարձը կունենա պանրի արտադրության ակտիվ շրջանում, որը սարերի հետևում չէ: Առայժմ դրանց ծավալները մեծ չեն: Արգելքի դեպքում խնդիրներն ի հայտ կգան կաթնատվության սեզոնի մեկնարկի հետ:
Եթե հակական պանիրը խնդիր է առաջացնում ռուսական շուկայում, ապա ի՞նչ պանրից է օգտվում հայ սպառողը: Պանրագործների միության ղեկավարը վստահեցնում է, որ տեղական պանիրն իրականում խնդիր չունի: Մինչև սպառողին հասնելը այն ենթարկվում է ջերմամշակման:
2016 թվականը հայ պանրագործների համար լինելու է տնտեսական մարտահրավերների դեմ պայքարելու դժվարին տարի: Նրանք, ովքեր կկարողանան դիմակայել փոխարժեքի տատանումներին, ռուսական շուկայի քմահաճություններին և ճգնաժամի ալիքի բարձրացմանը, ինչպես գոյության կռվում՝ կանցնեն հաջորդ փուլ:
Այն, որ պանրագործների դժվարությունը արդեն սկսված է, Արմեն Գիգոյանի խոսքը հաստատում է հայկական շուկայում տիրող պատկերը: Վաճառողները նախ վստահեցնում են, որ պանիրը մինչև վաճառքի դրվելը անցնում է լաբորատոր փորձաքննություն:
Իսկ ահա աշխատանքի դժվարություններին անդրադառնալիս պանրավաճառները նկատում են սպառողների թվի նվազման միտում:
Պանրի արտահանման արգելքի մասին խնդիրը սպասում է, թե պատկան մարմինները վերջապես երբ կբարեհաճեն դրա վրա լույս սփռել:
