«Ես իմ ամբողջ կյանքում անկուսակցական եմ եղել, բայց ունեմ որոշակի գաղափարական հիմքեր, քաղաքագիտական մտքեր, ունեմ իմ փիլիսոփայությունը, արժեքային համակարգը եւ եթե անցնեմ հրապարակային քաղաքական գործունեության, այդ մասին կանխավ կխոսեմ»:
Այս մասին մեզ հետ զրույցում նշեց երեկ հրաժարական ներկայացրած առողջապահության արդեն նախկին փոխնախարար Թաթուլ Հակոբյանը` չբացառելով, որ ապագայում կանդամակցի «Հանրապետական» կուսակցությանը:
– Նոյեմբերի 4-ին վարչապետ Տիգրան Սարգսյանը քննադատության ենթարկեց ԿԳՆ-ին եւ ԱՆ-ին: Որքանո՞վ են այդ սուր քննադատությունները շաղկապված ձեր հրաժարականի հետ:
– Ես շաղկապում չեմ տեսնում: Իմ հրաժարականը պայմանավորված էր այսօրվա աշխատանքային իրավիճակով եւ պայմաններով, ինչպես նաեւ իմ եւ նախարարի աշխատանքի անհամատեղելիությամբ: Նախարարի հետ մենք անհամատեղելի ենք ընդհանրապես մեր գաղափարներով, մեր մոտեցումներով, աշխատանքի ոճով եւ այլն: Այս հրաժարականը տարիների ընթացքում մեր համատեղ աշխատանքի արդյունքն էր, ես այլեւս անընդունելի եւ անտանելի եմ համարում այս պայմաններում աշխատանքը, հետեւաբար դիմել եմ վարչապետին, որ ինձ ազատի աշխատանքից:
– Դուք նշում եք, որ հրաժարականի պատճառը եղել է նախարարի հետ ձեր համատեղ աշխատանքի անհամատեղելիությունը, որը նույնիսկ անտանելի աստիճանի է հասել: Կարո՞ղ եք նշել, թե կոնկրետ ո՞րն է եղել ձեր համատեղ աշխատանքի անհամատեղելիության պատճառը:
– Ո՛չ: Դրանք արմատապես տարբեր գաղափարական մոտեցումներ են առողջապահական համակարգի զարգացման ուղղությամբ: Ընդամենը դա կարող եմ ասել եւ ոչինչ ավելին:
– Իսկ կիսո՞ւմ եք վարչապետի այն կարծիքը, որ առողջապահության համակարգը կոռումպացված է:
– Ես չեմ ցանկանում մեկնաբանել վարչապետի խոսքերը, բայց եթե վարչապետը նման հայտարարություն է արել, ուրեմն հիմքեր ունեցել է:
– Շատերը կարծում են, որ այս ամենը կազմակերպված էր հանրապետականների եւ բարգավաճականների միջեւ սեպ խրելու համար:
– Ես անկուսակցական եմ եւ որեւէ, հրապարակային քաղաքականության մեջ ներգրավված չեմ եղել: Ես ընդամենը եղել եմ իմ մասնագիտական դաշտում:
– Դուք նշեցիք, որ ինքնակամ եք ներկայացրել հրաժարականի դիմումը, իսկ ինչպե՞ս կմեկնաբանեք այն հանգամանքը, որ ձեր հրաժարականի դիմումը հաջորդեց վարչապետի սուր քննադատությանը, որը հասցեագրված էր առողջապահության նախարարությանը:
– Գիտեք ինչ, այսպես կարող եմ ասել` վերջին շրջանում առողջապահության նախարարի կողմից կատարվեցին քայլեր, որոնք ինձ համար բացարձակապես անընդունելի էին:
– Եթե կարելի է փաստերով խոսեք եւ մեկնաբանեք այդ քայլերը, որոնք ձեզ դուր չեն եկել:
– Ո՛չ, չեմ կարող մեկնաբանել: Երբ մի խնդիր կուտակվում է, մի պահ է գալիս, որ այդ խնդիրը հանգուցալուծում է պահանջում: Հանգուցալուծումն այն էր, որ միասին աշխատելն անհնար էր դարձել: Իսկ եթե միասին անհնար է աշխատել, ես պետք է դիմեի այս քայլին եւ աշխատանքից ազատվելու դիմում գրեի: Մնալս այլեւս իմաստ չուներ:
– Իշխանական մեր աղբյուրները վկայում են այն մասին, որ դուք այսուհետ պատրաստվում եք անդամակցել «Հանրապետական» կուսակցությանը:
– Նման խոսակցություննե՞ր կան: Ես իմ ամբողջ կյանքում անկուսակցական եմ եղել, բայց ունեմ որոշակի գաղափարական հիմքեր, քաղաքագիտական մտքեր, ունեմ իմ փիլիսոփայությունը, արժեքային համակարգը եւ եթե անցնեմ հրապարակային քաղաքական գործունեության, այդ մասին կանխավ կխոսեմ: Այս պահին ես դեռ շարունակելու եմ իմ փորձագիտական մասնագիտական աշխատանքը նույն առողջապահության զարգացման ուղղությամբ:
– Նախարարը ինչպե՞ս ընդունեց ձեր հրաժարականի դիմումը:
– Ես նախարարի հետ չեմ խոսել այդ հարցով, դա իմ որոշումն է, որը ներկայացրել եմ վարչապետին:
Հ.Գ. Մենք փորձեցինք զրուցել նաեւ հրաժարականի դիմում ներկայացրած մյուս փոխնախարարի` Աբրահամ Մանուկյանի հետ, սակայն նա ամբողջ օրվա ընթացքում հեռախոսազանգերին չպատասխանեց:
