Մոսկվան պահանջում է թույլ տալ ռուս դիվանագետներին այցելել Վրաստանում լրտեսության կասկածանքով ձերբակալված ռուսաստանցիներին: Թբիլիսին, իր հերթին, նշում է, որ ձերբակալված ռուսաստանցիներին տրամադրվել են բոլոր օրինական իրավունքները:
Թբիլիսին Մոսկվայի հետ բանակցություններ չի վարում լրտեսության մեջ մեղադրվող ՌԴ քաղաքացիների հարցով, մինչդեռ Վրաստանի ԱԳՆ-ն արդեն Ռուսաստանից նոտա է ստացել` այդ մարդկանց մասին տեղեկատվություն տրամադրելու պահանջով, BBC-ին տված հարցազրույցում հայտնել է Վրաստանի արտաքին գործերի նախարարի տեղակալ Նինո Կալանդաձեն: «Պաշտոնական նոտա ենք ստացել Շվեյցարիայի դեսպանատան միջոցով, դրա համաձայն` նրանք պահանջում են տեղեկատվություն այդ անձանց մասին եւ հավաստիացումներ, որ նրանք իսկապես Ռուսաստանի քաղաքացիներ են»,- ասել է Կալանդաձեն:
«Նրանք նաեւ դիմել են մեզ խնդրանքով` իրենց հնարավորություն տալ զրուցել իրենց քաղաքացիների հետ…. եւ մենք, իհարկե, կապահովենք այդ ձերբակալվածներին օրենսդրությամբ նախատեսված բոլոր իրավունքներով»,- ասել է նա:
Հիշեցնենք, որ Ռուսաստանի ԱԳ նախարար Սերգեյ Լավրովը հայտնել է լրագրողներին, որ Մոսկվան պահանջում է, որպեսզի ձերբակալվածների հետ հանդիպեն ռուս դիվանագետները` պարզելու համար, թե նրանց մեջ կա՞ն Ռուսաստանի քաղաքացիներ: Լավրովը նաեւ հայտնել է, որ այդ գործով բանակցություններ չեն տարվում, եւ չի տրամադրվում որեւէ բացատրություն:
«Կան հյուպատոսական գործընթացներ, մենք պահանջում ենք հյուպատոսական մուտք: Եւ եթե նրանք մեր քաղաքացիներն են, ապա մենք ցանկանում ենք համոզվել դրանում»,- ասել է Լավրովը:
Հիշեցնենք, որ նոյեմբերի 5-ին պաշտոնական Թբիլիսին հայտնեց13 ձերբակալվածների մասին, որոնցից չորսը Ռուսաստանի քաղաքացիներ են` Արմեն Գեւորգյանը, Ռուբեն Շիկոյանը, Պետրե Դեւրիշաձեն եւ Յուրի Սկրիլնիկովը: