Ղազախստանում քիչ առաջ տեղի է ունեցել հերթական երկրաշարժը: Միջերկրածովյան սեյսմոլոգիական կենտրոնը հաղորդել է, որ վերջին երկրաշարժի էպիկենտրոնը, որի ուժգնությունն էպիկենտրոնում կազմել է 4.2 մագնիտուդ, եղել է Ղազախստանի նախկին մայրաքաղաք Ալմաթիում: Երկրաշարժը բավական ուժեղ է եղել, քանի որ այն շատ մոտ է եղել երկրի մակերեսին` մոտ 4 կմ խորության վրա:
Սա արդեն 10-րդ երկրաշարժն է, որ գրանցվում է միջինասիական այս պետությունում վերջին մեկ օրվա ընթացքում: Ամենաուժեղը եղել է 5.4 մագնիտուդ ուժգնությամբ, մյուսներն` ավելի թույլ: Ղազախստանի արտակարգ իրավիճակների նախարարությունը (ԱԻՆ) տեղեկացնում է, որ զոհեր և ավերածություններ չկան: Մասնագետները նշում են, որ թույլ ցնցումներ դեռ կշարունակվեն:
Ալմաթին Ղազախստանի ամենախոշոր քաղաքն է, որի բնակչությունը հասնում է 1.5 միլիոնի: Այն գտնվում է սեյսմիկ ակտիվ գոտում: Տեղեկացնենք նաև, որ այստեղ ամենահզոր երկրաշարժերը գրանցվել են 1887, 1889, 1911թթ.: