Ռուսական RIA Novosti լրատվական գործակալության փոխանցմամբ՝ Ռուսաստանի փոխարտգործնախարար Գրիգորի Կարասինը Մոսկվայում իր իրանցի գործընկեր Իբրահիմ Ռահիմպուրի հետ քննարկել է Ղարաբաղյան հակամարտության կարգավորման հարցը։ Այդ մասին նշված է ՌԴ ԱԳՆ տարածած հայտարարությունում։
Դրանում նշված է, որ կողմերը քննարկել են տարածաշրջանային օրակարգի մի շարք հարցեր, հատուկ ուշադրություն է հատկացվել Հարավային Կովկասում ու Կենտրոնական Ասիայում տիրող իրավիճակին, Ղարաբաղյան հակամարտության կարգավորմանը, ինչպես նաև Ուկրաինայի ճգնաժամի կարգավորման վերաբերյալ մինսկյան պայմանավորվածությունների իրագործմանը։
Սրանից առաջ հաղորդվել էր, որ Իրանի ԱԳՆ պաշտոնական ներկայացուցիչ Հուսեին Ջաբեր Անսարին հայտարարել է, որ Թեհրանը կողմերի ցանկության դեպքում պատրաստ է միջնորդի դերում հանդես գալ Ղարաբաղյան հակամարտության կարգավորման հարցում։ Բացի դրանից՝ Իրանի նախագահ Հասան Ռուհանին վերջին օրերին հեռախոսազրույցներ է ունեցել Հայաստանի և Ադրբեջանի նախագահների հետ։