Աշխարհի խոշորագույն ավտոմոբիլաշինական խմբերը 2015 թվականին շուկայից հետ են կանչել 51 միլիոն ավտոմեքենա, ինչը պատմության մեջ ռեկորդային ցուցանիշ է: Այս մասին գրում է The Wall Street Journal-ը՝ վկայակոչելով ԱՄՆ-ի Ճանապարհային երթևեկության անվտանգության ազգային վարչության տվյալները։
Անցյալ տարի ամենից հաճախ հետ են կանչվել Fiat Chrysler-ի, Honda-ի, Ford-ի, Toyota-ի և General Motors-ի արտադրության ավտոմեքենաներ: Այս ընկերություններին է բաժին ընկնում բոլոր հետկանչերի 72 տոկոսը:
Միայն Takata-ի արտադրության անվտանգության բարձիկերի անսարքության պատճառով 2015 թվականին ավտոարտադրողները գործարան են վերադարձրել շուրջ 17 միլիոն ավտոմոբիլ:
NHTSA-ի տվյալները հաշվի չեն առնում Volkswagen-ի՝ դիզելային շարժիչներով ավտոմոբիլների հետկանչումը, քանի որ դրա պատճառ էր դարձել ոչ թե տեխնիկական անսարքությունը, այլ վնասակար նյութերի արտանետումների չափորոշիչների խախտումը։