Դատարանում ՀՀ ոստիկանության շահերը պաշտպանող Սոնա Մելիքյանը կարծում է, որ եթե լրագրողներն իրեն լուսանկարեն, ապա լուսանկարը կհայտնվի սոցցանցերում, և ՀՀ քաղաքացիները իր մասին անհեթեթ մեկնաբանություններ կգրեն: Թե ինչու է Ոստիկանության ներկայացուցիչը վստահ, որ մեկնաբանությունները անհեթեթ են լինելու, պարզ չէ, սակայն հարկ է նշել, որ Սոնա Մելիքյանն ինքն է իր լուսանկարները հրապարակել «Ֆեյսբուքում», որոնք հասանելի են ոչ միայն իր վիրտուալ ընկերներին, այլև ամբողջ հանրությանը:
Սոնա Մելիքյանը ՀՀ վարչական դատարանում ներկայացնում է ՀՀ ոստիկանության շահերը, որի դեմ բողոք է ներկայացրել «Վելես» հասարակական կազմակերպության նախագահ Մարինա Պողոսյանը: Նա պնդում է, որ ՀՀ ոստիկանության ներկայացուցիչները ականատես են եղել, թե Դատական ակտերի հարկադիր կատարման ծառայության աշխատակիցներն ինչպես են բռնություն գործադրել իր նկատմամբ և անգործություն են ցուցաբերել, որևէ կերպ չեն միջամտել: Արդյունքում իրավապաշտպանին հասցվել է ֆիզիկական վնասվածք:
«Այնքան վիրավորական էր տեսնել, որ ոստիկանները կանգնած հետևում են, թե 4 հաստամարմին տղամարդիկ ինչպես են բռնություն գործադրում իմ նկատմամբ: Միակ բանը, որ ոստիկաններն անում էին, դա հեռախոսով նկարելն ու ծիծաղելն էր»,- հիշում է Մարինա Պողոսյանը:
Ոստիկանության դեմ հայցի քննությունը սկսվեց երկու միջնորդությամբ: Մարինա Պողոսյանի շահերը ներկայացնող փաստաբան Արթուր Սուքիասյանը նախ դատարանին միջնորդեց թույլատրել լրագրողներին տեսանկարահանել դատական նիստը: Ինչպես արդեն նշեցինք, ոստիկանության ներկայացուցիչն առարկեց՝ նշելով, որ իր համար ցանկալի չէ, որ իր լուսանկարները «լայքեն»:
Մարինա Պողոսյանի կարծիքով՝ Մելիքյանի առարկությունն անհիմն է. «Եթե մարդ չի ցանկանում, որ իր լուսանկարները լայքեն կամ մեկնաբանեն, դրանք սոցիալական ցանցերում չի տեղադրում: Մենք տեղյակ ենք, որ Դուք բավականին ակտիվ եք սոցիալական ցանցում»,- ոստիկանության ներկացուցչին ասաց իրավապաշտպանը:
Դատավոր Ռաֆիկ Խանդանյանը, այնուամենայնիվ, համարեց, որ Մելիքյանի՝ «լայքերից» զերծ մնալու իրավունքը առավել կարևոր է, քան լրատվամիջոցների աշխատանքն ու դատական նիստի թափանցիկությունը: Դատավորը մերժեց տեսանկարահանելու միջնորդությունը:
Փաստաբանի երկրորդ միջնորդությունը վերաբերում էր դատավորին: Արթուր Սուքիասյանը վստահ է, որ դատավոր Խանդանյանը չի կարող անկողմնակալ քննություն անցկացնել սույն գործով: Բանն այն է, որ նույն դատավորը նախկինում քննել է Մարինա Պողոսյանի մեկ այլ հայց՝ ընդդեմ ԴԱՀԿ ծառայության, և եկել եզրակացության, որ նրա նկատմամբ ֆիզիկական ուժ գործադրելու փաստը հաստատված չի: Սա այն դեպքում, երբ քրեական գործի շրջանակներում նույն ԴԱՀԿ ծառայության աշխատակիցները չեն հերքել, որ բռնություն են գործադրել:
Այժմ, երբ Պողոսյանը բողոքարկում է ոստիկանության անգործությունը՝ իր նկատմամբ կիրառվող բռնության առնչությամբ, դատավոր Խանդանյանն արդեն իսկ կողմնակալ դիրքորոշում ունի սույն գործի կապակցությամբ: «Փաստորեն, սույն վարչական գործի քննության ընթացքում նախագահող դատավորը պետք է իրավական դիրքորոշում հայտնի և եզրահանգումներ կատարի այնպիսի փաստի վերաբերյալ, որի կապակցությամբ դատավորի դիրքորոշումն արտահայտված է մեկ այլ վարչական գործով կայացված վճռում և արդեն հայտնի է: Բնական է, որ վճռում արտահայտված դիրքորոշումը նույն դատավորի կողմից պետք է լինի անփոփոխ»,- նշված է փաստաբանի միջնորդությունում:
Այլ կերպ ասած՝ եթե Պողոսյանի գործը քննի դատավոր Ռաֆիկ Խանդանյանը, ապա արդեն իսկ առավել քան ակնհայտ է, որ Պողոսյանի պահանջը մերժվելու է: Փաստաբանն այս հիմքով դատավորին ինքնաբացարկի միջնորդություն հայտնեց: Դատավոր Խանդանյանը միջնորդությունը քննարկելու համար մեկ օրով հետաձգեց դատական նիստը:
Իրավապաշտպան Մարինա Պողոսյանը և Արթուր Սուքիասյանը, սակայն, չեն ներկայացել հաջորդ նիստին՝ միջնորդության վերաբերյալ դատարանի որոշմանը ծանոթանալու:
Պողոսյանն իրենց չներկայանալն այսպես բացատրեց. «Եթե մեր միջնորդությունը պետք է մերժվի, ապա մենք չենք պատրաստվում մասնակցել այդ բեմականությանը: Մենք ինքներս մեզ հարգում ենք: Դատավորը կողմնակալ է և չի՛ կարող քննել այս գործը»:
«Առաջին լրատվական»-ին հայտնի դարձավ, որ դատավոր Խանդանյանը մերժել է ինքնաբացարկի միջնորդությունը և հետաձգել գործի քննությունը:
Լուսանկարում՝ ոստիկանության ներկայացուցիչ Սոնա Մելիքյան և դատավոր Ռաֆիկ Խանդանյան
