Սաուդյան Արաբիայի և Իրանի միջև հակամարտության ֆոնին նավթի համաշխարհային գները սկսել են աճել։ Այս մասին գրում է The Wall Street Journal-ը։ Պարբերականը հայտնում է, որ նավթի գինը բարձրացել է ավելի քան 3 տոկոսով։ Այնուհանդերձ, շվեյցարական UBS բանկի գնահատականով՝ Brent նավթի գինը կարող է առաջին կիսամյակում հասնել մեկ բարելի դիմաց 30 դոլարի։
Իրանն ու Սաուդյան Արաբիան ՕՊԵԿ-ի խոշոր անդամներ են։ Արդեն փետրվարին՝ պատժամիջոցների վերացումից հետո, իրանական նավթը կսկսի մտնել շուկա։ Ռուսաստանում Merrill Lynch-ի վերլուծական ստորաբաժանման ղեկավար Կարեն Կոստանյանի խոսքով՝ կարճաժամկետ հեռանկարում հակամարտությունը երկու կողմերի միջև կազդի նավթի գնի վրա, սակայն նավթի առաջարկի ավելցուկը պահանջարկի նկատմամբ հազիվ թե վերանա այդ աշխարհաքաղաքական հակամարտության հետևանքով։
Կարեն Կոստանյանի կանխատեսմամբ` իրավիճակի ազդեցության ներքո նավթի գները կարող են փոխվել 2-3 ամսվա ընթացքում։ Եթե իրանական նավթը հայտնվի շուկայում արդեն փետրվարի սկզբին՝ դա + 37 մլն բարել է, որը նրանք ունեն պահեստարաններում, այսինքն՝ աշխարհում նավթի՝ կես օրվա սպառման ծավալը։ Իրանը կարող է նաև մեծացնել նավթի արտահանումն ասիական շուկաներ։ Դրա ֆոնին նավթի գնի աճը երկար չի տևի։
Փորձագետի կարծիքով՝ նավթի գինը միջինը կլինի մոտ 50 դոլար, իսկ 2018-19 թվականներին կհասնի մեկ բարելի դիմաց 70-80 դոլարի։
Նավթի արդյունաբերությունում համաշխարհային ներդրումները 2015-ին նվազել են մոտ 150 մլրդ դոլարով։ Սպասվում է, որ 2016-ին այդ ցուցանիշը նույնպես կնվազի՝ հասնելով 150-200 մլրդ դոլարի։