NDTV-ի փոխանցմամբ՝ Ֆլորիդայի Կենտրոնական համալսարանի գիտնականները պարզել են, որ զարմանալի մեխանիզմ է գործում. երբ մարդը ուտելիս հայելու մեջ նայում է իրեն, ապա վնասակար մթերքները նրան կթվան պակաս համեղ ու գրավիչ։ Մասնագետները խորհուրդ են տալիս արագ սննդի ռեստորաններում կախել հայելիներ, որպեսզի մարդկանց հեռու պահեն վնասակար սննդից։ Դրանով իսկ մարդիկ զգալիորեն կկրճատեն վնասակար սննդի օգտագործումը։
Համապատասխան փորձին մասնակցել է 185 կամավոր, որոնց մի մասին տրվել է շոկոլադե տորթ, իսկ մյուս մասին՝ մրգային աղցան։ Ընդ որում՝ պահանջվել է սննդի համը գնահատել՝ գտնվելով հայելիներով սենյակում և հայելիներ չունեցող սենյակում։ Տորթն ընտրած մարդիկ այն ավելի պակաս համեղ են գնահատել հայելիներով սենյակում՝ համեմատած առանց հայելիների սենյակի մարդկանց հետ։ Մինչդեռ մրգային աղցանի համի ընկալման վրա որևէ ազդեցություն չի թողել հայելիների առկայությունը կամ բացակայությունը։
Փորձագետների կարծիքով՝ մարդը, նայելով հայելուն, տեղեկատվություն է ստանում իր արտաքին տեսքի մասին, ինչն էլ նրան հնարավորություն է տալիս օբյեկտիվորեն գնահատել իրեն, գնահատել իր պահվածքը, այն համեմատել սոցիալական չափորոշիչների հետ։ Իսկ վերջիններս վկայում են, որ վնասակար սնունդը վտանգավոր է։
