Երեկվանից ուժի մեջ է մտել դեկտեմբերի 6-ի հանրաքվեի արդյունքում ընդունված նոր Սահմանադրության 5 գլուխ։ Ուժի մեջ մտած գլուխները վերաբերում են մարդու իրավունքներին, պետության քաղաքականությանը, սոցիալ-տնտեսական և մշակութային ոլորտներում օրենսդրական երաշխիքներին, տեղական ինքնակառավարմանը և մի քանի այլ ոլորտների։ Սակայն սահմանադրական բարեփոխումներին դեմ արտահայտվողները շարունակում են պնդել, որ այս նոր Սահմանադրությունը ոչնչով չի կարող բարելավել մինչ այդ եղած վիճակը։ Ավելին՝ նոր ու ավելի բարդ խնդիրներ է առաջ բերելու։
Փաստաբանի խոսքով՝ երաշխիք չկա նաև այն հավաստիացումներում, թե նոր Սահմանադրության ընդունումից հետո մնացած օրենսգրքերը կփոփոխվեն և կվերացվեն եղած խնդիրները։
Սահմանադրական փոփոխություններին դեմ արտահայտված փաստաբաններից Գևորգ Գյոզալյանը այս անգամ էլ մեզ հետ զրույցում պնդեց, որ խախտումներով անցած Սահմանադրությունից բխած ցանկացած իրավական գործընթաց անօրինական է, և հիմա խոսել, թե նոր Սահմանադրության գլուխները արդեն իսկ մտել են ուժի մեջ և ապագայում գործող օրենսգրքերը հարմարեցվելու են դրան՝ անտեղի է։
Բաղդասարյանը համակարծիք չէ Գյոզալյանի հետ, սակայն պնդում է, որ Սահմանադրությունը պետք է ընդունելի լինի ժողովրդի կողմից, ինչը այս դեպքում հնարավոր չէ պնդել։
ՀՀԿ խմբակցության պատգամավոր Մարգարիտ Եսայանը, մինչդեռ, բոլորովին այլ կարծիքի է։ Նա մեզ հետ զրույցում շտապեց շնորհավորել հայ ժողովրդին, որ իրենց հստակ դիրքորոշումը հայտնեցին դեկտեմբերի 6-ին, ապա կարևորեց նոր Սահմանադրության կիրառությունը, որը, ՀՀԿ-ական պատգամավորի խոսքով, լավ Սահմանադրություն ունենալուց ավելի կարևոր է։