Ադրբեջանական APA լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովը «Ազերթաջ»-ին տված հարցազրույցի ժամանակ հայտարարել է, որ իրենք բարձր են գնահատում ԵԱՀԿ Մինսկի խմբի համանախագահների ջանքերը, որոնք ուղղված են Ղարաբաղյան հակամարտության կարգավորմանը։
Ընդգծելով, որ Ռուսաստանի արտգործնախարար Սերգեյ Լավրովը կողմերին առաջարկներ է ներկայացրել Ղարաբաղյան հակամարտության կարգավորման վերաբերյալ՝ Մամեդյարովը հայտարարել է, որ այդ առաջարկներին աջակցում են նաև ԵԱՀԿ Մինսկի խմբի մյուս համանախագահող երկրները:
«Պատահական չէ, որ այդ քննարկումների հետ կապված՝ Լավրովը 2014 թվականին գործնական այցերով եղել է Երևանում ու Բաքվում։ Այդ առաջարկների վերաբերյալ կարծիքներ են փոխանակել Հայաստանի և Ադրբեջանի նախագահները։
Այդ առաջարկները, ընդգրկելով 2014 թվականին Սոչիում, Նյու Պորտում և Փարիզում անցկացված հանդիպումների ժամանակ նախագահներիմիջև ձեռք բերված պայմանավորվածությունները, պատրաստվել են Մադրիդյան սկզբունքների հիման վրա։ Նորացված Մադրիդյան սկզբունքները, որոնք բաղկացած են 6 կետից, հայտնի են լայն հանրությանը։
Եկել է բազմակողմ խաղաղության համաձայնագրի նախապատրաստությունը սկսելու ժամանակը՝ հենված Մադրիդյան նորացված սկզբունքների վրա»,- ասել է նա։
Մամեդյարովի խոսքով՝ Բեռնում Հայաստանի և Ադրբեջանի նախագահների հանդիպման ժամանակ քննարկվել է նաև հակամարտության հումանիտար ասպեկտը։