Հանրաքվեի օրը, ինչպես հայտնի է, հանրապետության մի շարք մարզերում, տարբեր համայնքներում «ոչ»-ի օգտին ոչ ոք, իսկ լավագույն դեպքում 2-3 հոգի էր քվեարկել: Այդ առումով առանձնանում է հատկապես Արագածոտնի մարզը: Օրինակ՝ մարզի Ավշեն համայնքում «այո»-ի օգտին քվեարկել է 125, իսկ «ոչ»-ի օգտին՝ ընդամենը 1 հոգի, Միջնատուն համայնքում 43՝ «այո», 0՝ «ոչ»: Սադունց համայնքում 143՝ «այո», 0՝ «ոչ», Հնաբերդում 248՝ «այո», 4՝ «ոչ»: Այս ուշագրավ թվերի հետ կապված մի քանի հարց ուղղեցինք նախ Ավշենի համայնքապետին:
– Պարոն Բադոյան, ինչպե՞ս է պատահել, որ ձեր համայնքում «ոչ»-ի օգտին ընդամենը 1 հոգի է քվեարկել: Շատ լավ քարոզչությո՞ւն էր իրականացվել, թե՞ կեղծիքներ են արվել:
– Գիտեք, մենք, մեր համայնքը՝ որպես ազգային փոքրամասնություն, միշտ կանգնած ենք իշխանությունների կողքին: Ուրիշ կուսակցություն լիներ իշխանության ղեկին, իրենց կողքին կկանգնեինք: Զուտ դա է պատճառը:
– Բայց տրամաբանական համարո՞ւմ եք, որ միայն մեկ հոգի կարող էր «ոչ» քվեարկել նոր Սահմանադրությանը:
– Դե համայնքում 120-125 մարդ է բնակվում, ու բոլորով որոշել ենք տենց քվեարկենք: Եզդիական բոլոր համայնքները էդպես են քվեարկել, ու էդպիսով կանգնել ենք իշխանությունների կողքը: Դա ոնց որ մեզ մոտ բնատուր լինի էլի, իշխանությունների կողքը կանգնելը: Ով իշխանություն է, մենք նրա կողքին ենք:
– Իսկ դա Ձեզ, ձեր համայնքին ի՞նչ է տալիս: Իշխանությունները ձեզ համար արտոնություններ են սահմանում:
– Դե հիմա, ոչ մի արտոնություն էլ չեն տալիս, ում են ինչ տալիս, որ մեզ ինչ տան: Ուղղակի մենք «այո»-ի կողմնակից ենք, քանի որ նոր Սահմանադրությամբ խորհրդարանում ազգային փոքրամասնության ներկայացուցիչ պետք է լինի: Դրանից դրդված էլ մենք «այո» ենք ասել:
– Պարոն Բադոյան, իսկ Դուք արդեն պարզե՞լ եք, թե ով է այն մեկ հոգին, ով «ոչ» է քվեարկել: Պատժելո՞ւ եք նրան:
– Չէ՛, չենք պարզել, դե մի հոգի է, դա դեր չի խաղում:
Որևէ «ոչ» ձայն չունեցող Միջնատուն համայնքի ղեկավարը՝ ՀՀԿ-ական Թենգիզ Մամոյանը, «Առաջին լրատվական»-ի հետ զրույցում ասաց, որ չի կարող բացատրել, թե ինչպես է դա պատահել: Ասաց՝ ժողովրդի ընտրությունն է, բայց միանշանակ կարող է փաստել, որ կեղծիք չի եղել:
«Սաղ ժողովուրդն էլ տեղյակ էր, թե ինչի համար է քվեարկում, բոլոր կուսակցություններից էլ եկել քարոզչություն իրականացրել են: Համայնքում ցուցակով 189 հոգի են, բայց գյուղում չեն ապրում, դրա համար էլ 43 հոգի է քվեարկել»,- ասաց Միջնատուն համայնքի ղեկավարը:
Որևէ մեկը նոր Սահմանադրությանը «ոչ» չի ասել նաև Սադունց համայնքում: ՀՀԿ-ական համայնքապետ Էդվարդ Սադունյանը Ավշենի համայնքապետի օրինակով իրենց որոշումը բացատրեց նրանով, որ նոր Սահմանադրությամբ նախատեսվում է, որ ազգային փոքրամասնություններից պետք է ներկայացուցիչ լինի խորհրդարանում, դրա համար էլ իրենք միաձայն հավաքվել են և որոշել գնալ ու «այո» քվեարկել:
– Մենք, ինչ խորհրդարանը ստեղծվել է, եզդի ազգը պայքարում է, որ խորհրդարանում մեր ազգից մի հոգի լինի: Ու հիմա էս նոր Սահմանադրությամբ դա նախատեսվում է: Դրա համար էլ ամբողջ գյուղով հավաքվեցինք և որոշեցինք «այո» ասել, որ ոչ մի քվե իզուր չանցնի:
– Դուք անձամբ Ձեր նախաձեռնությա՞մբ եք գյուղացիներին հավաքել ու հորդորել «այո» քվեարկել, թե՞ ՀՀԿ-ից Ձեզ նման հրահանգ է իջեցվել:
– Չէ՛, գիտեք, մեր ամբողջ ժողովուրդը հանրաքվեի գնում էր սրտանց, որ էդ բանը լինի:
–Պարոն Սադունյան, իսկ Դուք բացառո՞ւմ եք, որ այդ համատարած «այո»-ն կեղծիքի, լցոնման արդյունք լիներ:
– Դա միանգամայն բացառված է: Հանձնաժողովում «Ժառանգությունից» մարդ կար, պայքար էր տանում, ՀԱԿ-ից մարդ կար: Այնպես որ, բացառված է, որ խախտում լիներ: Սա մաքուր քվեարկություն է եղել, և մենք դրան գնացել ենք գիտակցաբար:
Նշենք, որ գրեթե նույն պատասխանը տվեցին նաև մնացած համայնքների ղեկավարները՝ նշելով, որ իրենք հավատարիմ են իշխանություններին, իսկ ընտրախախտումը բացառված է:
Լուսանկարը` PAN Photo-ի