Ղարաբաղա-ադրբեջանական շփման գծում հակառակորդը, շուրջ 180 անգամ խախտելով հրադադարի ռեժիմը, հետպատերազմական ընթացքում առաջին անգամ հայկական հենակետերը գնդակոծել է տանկերով։
Հակառակորդի խոշոր տրամաչափի հրացանի արձակած կրակոցից մարտական հենակետում զոհվել է Լեռնային Ղարաբաղի պաշտպանության բանակի ժամկետային զինծառայող, 1991թ․ ծնված Գարիկ Գուրգենի Ավանեսյանը։
Միջազգային և անվտանգության հարցերի հայկական ինստիտուտի տնօրեն Ստյոպա Սաֆարյանի կարծիքով՝ արդեն ակնհայտ է, որ հակառակորդի կողմից օգտագործվում է բացառապես պատերազմական շրջանին բնորոշ զինտեխնիկա, խախտվում է ոչ միայն հրադադարի ստորագրման պայմանագիրը, այլ միջազգային մի շարք լուրջ պայմանավորվածություններ։ Ստյոպա Սաֆարյանն այստեղ տեսնում է նաև հայկական կողմի բացթողումը։
Երեկ հայկական լրատվամիջոցները տարածել էին տեսանյութ, որտեղ երևում է, թե ինչպես է հրաձգության արդյունքում հայկական կողմը ոչնչացնում առնվազն երեք ադրբեջանական ռազմական օբյեկտ և մի քանի ադրբեջանցի զինծառայող։ Սաֆարյանի դիտարկմամբ՝ հույսը չի կարելի դնել միայն սիմետրիկ պատասխանների վրա։
Լեռնային Ղարաբաղի նախագահ Բակո Սահակյանի մամլո խոսնակ Դավիթ Բաբայանը նշեց, որ հակառակորդի այս գործողությունները ևս մեկ ազդակ պետք է լինեն միջազգային հանրության համար, ավելի հասցեական հայտարարություններ անելու համար։
Հայ-ադրբեջանական շփման գծում իրավիճակը շարունակում է մնալ լարված Հայաստանի և Ադրբեջանի նախագահների հանդիպումից ընդամնեը մի քանի օր առաջ։ Հիշեցնենք, որ Մինսկի խմբի ամերիկացի համանախագահ Ջեյմս Ուորլիքը հայտարարել էր, որ մինչև տարեվերջ Մինսկի խմբի հովանու ներքո տեղի կունենա այդ հանդիպումը։ Ստյոպա Սաֆարյանի դիտարկմամբ՝ հաշվարկը կատարված է հենց այդ հանդիպման վրա։
Ի դեպ, ՀՀ պաշտպանության նախարար Սեյրան Օհանյանն է հեռախոսազրույցով սահմանային լարված իրավիճակը քննարկել ԵԱՀԿ գործող նախագահ Անջեյ Կասպրշչիկի հետ։ Խորհրդարանում լրագորղների հետ զրույցում Օհանյանը խոստովանել է՝ այո սահմանային լարվածությունը հասել է գագաթնակետին։
