Նավթ արտահանող երկրների կազմակերպությունը (ՕՊԵԿ) որոշում է ընդունել պահպանելու նավթի արդյունահանումը ընթացիկ մակարդակի վրա՝ հայտարարել է Նիգերիայի նավթարդյունահանման նախարար Էմանուել Իբե Կաչիկվուն Վիեննայում կարտելի գագաթնաժողովի ընթացքում։ Այս մասին փոխանցում է Interfax-ը։
Կազմակերպության գլխավոր քարտուղար Աբդալլա Ալ-Բադրին նշել է, որ կարտելը հետաձգել է քվոտաների նոր մակարդակի մասին որոշումը մինչև հաջորդ հանդիպում, որը կկայանա Վիեննայում՝ 2016-ի հունիսի 2-ին։
«Մենք չենք կարող հիմա թվեր տալ (քվոտաների մակարդակի վերաբերյալ)։ Մենք չգիտենք, թե Իրանը երբ շուկա դուրս կգա։ ՕՊԵԿ-ի ներսում արդյունահանումը փոփոխվում է ժամանակ առ ժամանակ։ Մենք որոշել ենք հետաձգել այդ որոշումը մինչև հաջորդ հանդիպում… Մենք ուսումնասիրել ենք պահանջարկի մակարդակը, առաջարկի մակարդակը, տնտեսական իրավիճակն ու որոշել, որ իրավիճակը հիմա պարզ չէ»,- ասել է նա։
2011 թվականի դեկտեմբերից ՕՊԵԿ-ի արդյունահանման պաշտոնական քվոտան կազմում է օրական 30 մլն բարել։