Սահմանադրական փոփոխությունների հանրաքվեի օրը «Քաղաքացի դիտորդ» նախաձեռնությունը հանդես կգա մոտ 900 դիտորդներով հանրապետության ողջ տարածքում: Ինչպես տեղեկացրեց «Թրանսփարենսի ինթերնեշնլ» հակակոռուպցիոն կենտրոնի փոխտնօրեն Սոնա Այվազյանը՝ մի շարք կամավորներ դեռևս միանում են «Քաղաքացի դիտորդ» նախաձեռնությանը՝ դիտորդական առաքելություն իրականացնելու նպատակով:
«Իրավունքի Եվրոպա միավորման» նախագահ Լուսինե Հակոբյանն իր խոսքում անդրադարձավ արձանագրված խախտումներին: Դրանց թվում նա առանձնացրեց քարոզչության հավասար պայմանների խախտումները, մասնավորապես՝ այն, որ Հանրային հեռուստատեսությամբ հեռարձակվող հաղորդումը վարում է կրթության և գիտության նախարար Արմեն Աշոտյանը, ով նաև «Այո»-ի կողմնակից է:
Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցը փաստում է, որ ընտրական հանձնաժողովի ներկայացուցիչներից 203-ը ավագանու անդամներ են, ինչը Ընտրական օրենսգրքի 39-րդ կետի 2-րդ հոդվածի խախտում է:
«Եթե 10 տարի առաջ տեղի ունեցած սահմանադրական փոփոխությունների հանրաքվեն իշխանություններին հեշտությամբ հաջողվեց անցկացնել, ապա այս անգամ հեշտ չի լինելու»,- վստահ է Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը:
Միևնույն ժամանակ Լևոն Բարսեղյանը փաստում է՝ հիմնական վերահսկողությունն իրականացվելու է ընտրատեղամասերի ներսում՝ հանրաքվեի ողջ ընթացքում ու հաշվարկի ժամանակ, իսկ ընտրատեղամասերից դուրս կատարվող ընտրախախտումները՝ ընտրակաշառքների բաժանումը, քվեաթերթիկների «կարուսելը», վերահսկելը գրեթե անհնար է: Ընտրատեղամասերից դուրս կատարվող ընտրախախտումների դեմ պետք է պայքարի հասարակությունը: