Երեկ խորհրդարանի ֆինանսավարկային և բյուջետային հարցերի հանձնաժողովը վերջին անգամ քննարկեց և հաստատեց Վերահսկիչ պալատի 2016թ. գործունեության տարեկան ծրագիրը: Վերջին, որովհետև սահմանադրական փոփոխությունների հանրաքվեի դրական արդյունքի դեպքում նախատեսվում է, որ Վերահսկիչ պալատի փոխարեն կստեղծվի Հաշվեքննիչ պալատ, որը կլինի ավելի անկախ կառույց: Այնքանով անկախ, որ այդ մարմնի գործունեության ծրագրերը ենթակա չեն լինի ԱԺ հաստատմանը:
Ըստ ԱԺ տարածած տեղեկանքի՝ Վերահսկիչ պալատի գործունեության տարեկան ծրագիրը պետք է ներկայացներ պալատի նախագահ Իշխան Զաքարյանը, սակայն հանձնաժողովի նիստում տարեկան ծրագիրը ներկայացրեց ՎՊ նախագահի տեղակալ Լևոն Յոլյանը: Մեր այն հարցին, թե ինչու ՎՊ նախագահը ինքը չի ներկայացնում տարեկան ծրագիրը, պարոն Յոլյանը որևէ պատասխան չտվեց:
Սա Զաքարյանի առաջին բացակայությունը չէ Վերահսկիչ պալատին վերաբերող քննարկումների ժամանակ: ՎՊ 2016թ. տարեկան հաշվետվությունը դեռ պետք է քննարկվի և ընդունվի խորհրդարանի կողմից, և կարելի է վստահությամբ պնդել, որ խորհրդարանական քննարկումներին ևս Իշխան Զաքարյանը ներկա չի լինի: Սա ցույց է տալիս, որ Իշխան Զաքարյանը ընդամենը դե յուրե է Վերահսկիչ պալատի նախագահ, իսկ դե ֆակտո այդ պաշտոնը զբաղեցնում է նրա տեղակալ Լևոն Յոլյանը: Այս բացը երևի կլրացվի հաջորդ տարի, երբ Վերահսկիչ պալատը կդադարի գոյություն ունենալ, և դրա փոխարեն կստեղծվի Հաշվեքննիչ պալատը, որի նախագահ կլինի Յոլյանը:
Ինչ վերաբերում է Վերահսկիչ պալատի 2016թ. ծրագրին ապա այն իսկապես շատ հետաքրքիր է, և ինչպես նշում էին ՀՀԿ-ական պատգամավորները, այնտեղ ներառված են ոլորտներ և հարցեր, որոնք մինչև այժմ դուրս են մնացել վերահսկողությունից: Վերահսկիչ պալատը պետք է ուսումնասիրություն իրականացնի Ֆինանսների նախարարությունում՝ պարզելու համար, թե ինչպես է մաքսատների և մաքսակետերի, հարկային՝ տարածքային կենտրոնների կողմից իրականացվել պետական բյուջեի մուտքերի հավաքագրումը: Ուսումնասիրություն է իրականացվելու Պաշտպանության, Գիտության և կրթության, Կապի և տրանսպորտի նախարարություններում, Խաչատուր Աբովյանի անվան մանկավարժական համալսարանում և Մխիթար Հերացու անվան բժշկական համալսարանում, Ոստիկանության «Ճանապարհային ոստիկանություն» ծառայությունում՝ պարզելու, թե ինչպես են այստեղ օգտագործում պետական բյուջեից հավաքված միջոցները:
Սրանով ՎՊ 2016թ. համար նախատեսված ուսումնասիրությունների ոլորտը ամենևին չի սահմանափակվում: Բայց հարցը միայն նրանում չէ, թե ինչ է հաջորդ տարի ուսումնասիրելու այս կառույցը: Ավելի կարևոր են այդ ուսումնասիրությունների արդյունքները և հետևանքները: Կար ժամանակ, երբ ՎՊ նախագահ Իշխան Զաքարյանը իր կողմից ղեկավարվող կառույցի եռամսյակային ուսումնասիրությունների արդյունքները ամփոփելու համար ասուլիսներ էր կազմակերպում և խիստ աղմկահարույց բացահատումներ անում կատարված բազմամիլիոնանոց և նույնիսկ միլիարդանոց չարաշահումների վերաբերյալ, պետական բյուջեից ստացված, բայց ոչ նպատակային օգտագործված միջոցների հայտնաբերման մասին: Հրապարակվում էր, թե այդ խախտումների որ մասն է վերադարձվել բյուջե, իսկ որ մասը կարող է վերադարձվել: Նույնիսկ նյութեր էին ուղարկվում դատախազություն քրեական գործեր հարուցելու համար: Վերջին մի քանի տարիներին նման բան այլևս չկա, և դրա պատճառն ամենևին էլ չարաշահումների քանակի նվազումը չէ: Ուղղակի Հայաստանում չարաշահում կատարելը համարվում է կյանքի նորմ, իսկ դա բացահայտելը և դրա մասին բարձրաձայն խոսելը դիտվում է անթույլատրելի զբաղմունք:
Այնպես որ, ինչ ոլորտում էլ որ ստուգումներ իրականացնի ՎՊ-ը պարզ է, որ այդ ստուգումների արդյունքում կամ ոչինչ չի հայտնաբերվելու, կամ հայտնաբերվածն էլ այնքան չնչին է լինելու, որ հարց է առաջանալու, թե դրա համար ընդհանրապես իմաստ ուներ ստուգումներ կազմակերպել:
