Reddit կայքն իր օգտատերերին առաջարկել է շնորհավորանքի բացիկներ ուղարկել 10-ամյա դպրոցական Արոն Անդերսոնին, որն ապրում է բրիտանական կղզիներից մեկում` Աութ Սքերիսում:
65 բնակչությամբ կղզու դպրոցում Արոնը միակ աշակերտն է: Բոլոր առարկաները, որոնք նա ուսումնասիրում է, դասավանդում է մեկ ուսուցիչ: Պարբերականը նշում է, որ արշավի շուրջ աշխատել է ռեսուրսի մոդերատորներից մեկը: Նա հաղորդագրությունը հրապարակել է պորտալում` դիմելով Reddit-ի բոլոր ընթերցողներին: «Ես ցանկանում եմ, որպեսզի նրա դեմքին լայն ժպիտ հայտնվի»,- մակագրել է մոդերատորը:
Որպեսզի տղան կարողանա ստանալ բացիկները, մոդերատորը նախապես զանգահարել է դպրոց` ուսուցչին և ծնողներին պատմելով իր ծրագրի մասին: Նա հետևորդներին խնդրել է նամակներ չուղարկել մինչև դեկտեմբերի 7-ը, որպեսզի դրանք բոլորը հասնեն միաժամանակ և մինչև Սուրբ ծնունդ:
