Հայկական պետական մանկավարժական համալսարանի ռեկտոր Ռուբեն Միրզախանյանը հերքում է, թե համալսարանի դասախոս Հովհաննես Հովհաննիսյանին բուհի տարածքում ծեծի են ենթարկել սահմանադրական բարեփոխումներին դեմ լինելու համար։
Հիշեցնենք, որ այսօր մամուլի հրապարակումներից մեկի համաձայն՝ դասախոսին ծեծել են ՀՀԿ-ական «այո»-ականները՝ հենց սահմանադրական փոփոխությունների հողի վրա:
«Ամեն ինչ, ըստ լուրերի, սկսվել է սահմանադրական փոփոխությունների քննարկումից: Քննարկումն այնքան է թեժացել, որ վերածվել է ծեծկռտուքի՝ ուսանողների մասնակցությամբ»,- գրել է «Հայկական ժամանակ» օրաթերթը։
«Միջադեպը բացարձակ կապ չունի սահմանադրական բարեփոխումների գործընթացի հետ, ինչպես նաև ոչ մի կապ չունի Մանկավարժական համալսարանի հետ։ Կապն այնքանով է, որ միջադեպը տեղի է ունեցել Մանկավարժական համալսարանին հարող տարածքում և ոչ թե համալսարանի ներսում։ Իսկ վիճաբանությունը տեղի է ունեցել ավտոմեքենաները կայանելու, իրար ճանապարհ զիջելու հետ կապված»,- «Առաջին լրատվական»-ի հետ զրույցում ասաց Միրզախանյանը՝ հավելելով, որ միջադեպի մյուս կողմը ևս ոչ մի կապ չունի համալսարանի հետ։
Նշենք, որ Հովհաննես Հովհաննիսյանը Ֆրանսիական համալսարանի փիլիսոփայության ամբիոնի վարիչն է և դասաժամեր ունի Մանկավարժական և Երևանի պետական համալսարաններում։
Առավել մանրամասն՝ տեսանյութում:
