Սահմանադրական փոփոխությունների հանրաքվեին ընդառաջ՝ մի շարք քաղաքական գործիչներ, հասարակական կազմակերպություններ ու նախաձեռնություններ արդեն արձանագրում են մի շարք ընտրախախտումներ:
«Իրազեկ քաղաքացիների միավորում» ՀԿ նախագահ Դանիել Իոնիսյանը փաստում է, որ ընտրախախտումները հիմնականում կատարվում են ընտրատեղամասերի տարածքում, իսկ դեկտեմբերի 6-ին կայանալիք հանրաքվեին ընդառաջ՝ նկատելի է, որ իշխանության ներկայացուցիչներն արդեն փորձում են ազդել հանձնաժողովի անդամների վրա:
Իոնիսյանի կարծիքով՝ ընտրախախտումների գերակշիռը մասը ինչպես նախորդ ընտրություններում, այնպես էլ առաջիկա հանրաքվեում կկազմեն կրկնաքվեարկությունները: Իսկ դա կանխելը բավականին բարդ է: Ընդդիմադիր ուժերը չեն կարողանում ընտրատեղամասերում ապահովել վստահված անձանց անհրաժեշտ քանակ, շատ դեպքերում էլ հենց ընդդիմադիր ուժերի կողմից ներկայացված վստահված անձինք են կաշառվում կեղծարարների կողմից:
Ընտրակեղծիքների դեմ պայքարում ամենաարդյունավետ մեխանիզմը, ըստ Իոնիսյանի, բոլոր ընտրատեղամասերում անկաշառ վստահված անձանց ներկայությունն է:
«Քաղաքացի դիտորդ» նախաձեռնության անդամ Զառա Հովհաննիսյանը ևս փաստում է, որ ընտրախախտումների գերակշիռ մաս են կազմում կրկնաքվեարկությունները, և առաջիկա հանրաքվեին նույնականացման քարտերի կիրառումը դրանց հավանականությունն է՛լ ավելի կմեծացնի:
Զառա Հովհաննիսյանի դիտարկմամբ՝ ինչպես և նախորդ ընտրություններում, այս անգամ ևս իշխող հանրապետականների կողմից օգտագործվում են բոլոր հնարավոր վարչական ռեսուրսները: