Ամերիկյան «Եգիպտոսի աստվածները» ֆանտաստիկ մարտաֆիլմի ստեղծողները պատասխանել են ռասիզմի մեղադրանքին, հայտնում է Rosbalt-ը:
Ֆիլմի թրեյլերի հայտնվելուց հետո հանդիսատեսները սկսել են պրոդյուսերներին մեղադրել այն բանում, որ բոլոր եգիպտացի հերոսների դերերը խաղում են սպիտակամորթ դերասանները: Առաջին հերթին դա վերաբերվում է Ջերարդ Բաթլերին, Ջեֆրի Ռաշին, Նիկոլայ Կոստեր-Վալդաուին և Բրենտոն Թուերյթսին, որոնք խաղում են գլխավոր դերերում:
Առաջին քննադատողներից մեկը եղել է դերասանուհի և երգչուհի Բեթ Միդլերը: «Եգիպտացիները երբեք չեն առանձնացել մաշկի սպիտակ գույնով: Մի մոռացեք աշխարհագրության մասին: Դա Աֆրիկան է»,- գրել է նա իր սոցիալական ցանցերից մեկում:
Շատ չանցած Lionsgate ստուդիան և ֆիլմի ռեժիսոր Ալեքս Պրոյասը հանդես են եկել հայտարարությամբ:
«Դերասաններ ընտրելու գործընթացաը կախված է շատ գործոններից, սակայն բացարձակապես ակնհայտ է, որ մենք այդ պլանում պետք է լինեինք ավելի զգույշ: Ես անկեղծորեն ներողություն եմ խնդրում բոլորից, ում վիրավորել է մեր որոշումը»,- ասել է Պրոյասը: