«Նոր Հայաստան» հանրային փրկության ճակատի ընդդիմության միասնական շտաբի պետ Ժիրայր Սեֆիլյանը հայտարարում է՝ առաջիկա օրերն արտառոց և ճակատագրական են լինելու հայ ժողովրդի համար, և ինքն այնպիսի զգացողություն ունի, որ հասել են ինչ-որ եզրագծի:
Վաղը երեկոյան ժամը 18-ին Ազատության հրապարակում «Նոր Հայաստանը» նախատեսում է անցկացնել համազգային հանրահավաք։ Սեֆիլյանը հորդորում է՝ նրանք ովքեր ի վիճակի են հոգալ իրենց սննդի համար՝ մի քանի օրվա սնունդ բերեն իրենց հետ, ովքեր ոչ՝ շտաբն իր վրա կվերցնի պատասխանատվությունը։
Սեֆիլյանը հայտարարեց՝ քաղաքացիական անհնազանդության մի քանի տարբերակ են առաջարկելու, այդ թվում՝ վրաններով Ազատության հրապարակում գիշերելը։ Վերջնական տարբերակը, նրա խոսքերով՝ ժողովուրդն է որոշելու։
Ժիրայր Սեֆիլյանը նշեց նաև, որ իրազեկում են արել քաղաքապետարան վրանների թույլտվություն ունենալու համար։ Վերջանական որոշում վաղը կորոշեն տեղում։
Սեֆիլյանն ընդգծեց՝ Սերժ Սարգսյանը պետք է գիտակցի պահի լրջությունը և ինքնակամ հրաժարական տա, եթե ոչ, ապա նրան սպասվում է լավագույն դեպքում Վիկտոր Յանուկովիչի ճակատագիրը։
Երեկ «Նոր Հայաստան» հանրային փրկության ճակատը հայտարարություն է տարածել, որում մասնավորապես նշվում է, թե պատրաստ է միավորելու իր ուժերն իրավապահպան մարմինների հետ՝ երկրում ազգային անվտանգության և հասարակական կարգի ապահովման համար հանրային վերահսկողության հաստատման նպատակով: