Հայաստանի ֆուտբոլի ֆեդերացիայում այսօր տեղի ունեցավ ֆեդերացիայի նախագահ Ռուբեն Հայրապետյանի հանդիպումը հավաքականի Red Eagles ֆան ակումբի ներկայացուցիչների հետ։
«Ասել եմ, որ տեղի է ունեցել դավաճանություն, խաղ ծախելու հետ կապված խոսք չի եղել։ Անուններ չեմ տալիս, քանի որ դեռ փաստեր չունեմ։ Հավաքականի տղաները նվիրվա՞ծ են խաղում։ Ի՞նչ է նշանակում մեկ մարզմանը մասնակցել, մյուսին հրաժարվել․․․ Չե՞ք կարծում, որ այս տեսակից պետք է ազատվել։ Բոլորը կգան, հունվարին հրավիրելու եմ բոլորին միասին, զրուցեմ։ Այդ ժամանակ ամեն ինչ կներկայացնեմ։ Պայմանագրերը կապեցին, հարստացան ու դադարեցին հավաքականի մասին մտածել։ Այ սրա մասին պետք է խոսել։ Իրենց համար հավաքականը երկրորդական է։ Սա դավաճանություն չէ՞։
Սա չի վերաբերում Հենրիխ Մխիթարյանին, ով սուպերպրոֆեսիոնալ է։ Մտնում է դաշտ ու անկախ ամեն ինչից իր ֆուտբոլն է խաղում։ Բայց նա ի՞նչ պետք է անի, որ հարձակվողը մրցակցի պաշտպանի թիկունքում պաղկվում է։ Ֆուտբոլը բարդ գիտություն չէ, ուշադիր հետևեք ու կտեսնեք՝ ինչ է կատարվում դաշտում։ Գայելն ինչքան պետք է «ճղվի», որ կողքի պաշտպանը խաղա։ Դավաճանության հետ կապված խոսքը չի վերաբերում Հենրիխ Մխիթարյանին, Արազ Օզբիլիսին, Գայել Անդոնյանին, Մարկոսին, Սարկիսովին․․․»,- ասաց Հայրապետյանն ու հավելեց, որ սերբական մամուլի հայտարարության հիման վրա դատախազությունը գործ է հարուցել»։
Հավաքական չհրավիրվող ֆուտբոլիստների հետ կապված ՀՖՖ նախագահն ասաց․ «Արթուր Եդիգարյանը 20 րոպե հետո քսվում է գետնին։ Ազգային հավաքականն ուրիշ է, սա այլ մակարդակ է։ Բելառուսի առաջնությունում խաղալո՞վ պետք է որոշել հավաքականի թեկնածուներին։ Ինչու՞ պիտի Դենիս Թումնասյանին հրավիրենք, ով մեզ մատների վրա է խաղացնում, 10 անգամ մերժել է առաջարկը։ Մարզիչն ինքն ավելի լավ գիտի, ում կանչել, ում՝ ոչ։ Նա է մարզում թիմը։ Ես ցանկացած մարզչի ասում եմ իմ կարծիքը, ինքն է կայացնում վերջնական որոշումը։ Տոմսերի գների հետ կապված հարցը նույնպես դիտարկվում է։ Մի քանի տարբերակներ կան»։
ՀՖՖ փոխնախագահ Արմեն Մինասյանն ասաց, որ դիտարկվում է սեզոնային գների անցման հնարավորությունը։ Հնարավորություն կտրվի գնել Հայաստանի հավաքականի խաղերի ամբողջական փաթեթ, որտեղ յուրաքանչյուր խաղի կտրվածքով տոմսի գինն ավելի էժան կլինի, քան տոմսարկղերում առանձին խաղերի համար վաճառվող տոմսերի գները։
