Իսպանական զբոսաշրջային ընկերությունները պատրաստ են հանգստի այլընտրանքային ուղղություն դառնալ ռուսների համար՝ Եգիպտոս և Թուրքիա թռիչքների դադարեցումից հետո: Hosteltur զբոսաշրջային պարբերականը նշում է, որ երկրի գրավչությանը նպաստում են մի շարք գործոններ, այդ թվում՝ Ռուսաստանի տարածքում այցագրային կենտրոնների հստակ աշխատանքը:
Փորձագետները նշում են, որ այցագիր ստանալու անհրաժեշտությունը ռուսներին չպետք է հետ պահի Իսպանիայում հանգստից: Մուտքի փաստաթղթերի ստացման գործընթացը զբոսաշրջիկների համար հեշտացնելու համար Ռուսաստանում ներկայումս աշխատում է եվրոպական երկրի 27 այցագրային կենտրոն:
Նշվում է, որ ռուսական տուրօպերատորները դիտարկում են ձմռանը իսպանական Մալագա լրացուցիչ չարտերային չվերթներ բացելու հնարավորությունը:
Նոյեմբերի 28-ին Ռուսաստանի նախագահ Վլադիմիր Պուտինը հրամանագիր է ստորագրել Թուրքիայի նկատմամբ հատուկ տնտեսական միջոցառումների կիրառման վերաբերյալ: Մասնավորապես, արգելվել է Ռուսաստանի և Թուրքիայի միջև չարտերային օդային փոխադրումները, տուրօպերատորներին խորհուրդ է տրվել խուսափել Թուրքիա այց ենթադրող շրջագայություններից:
Ռուս-թուրքական հարաբերությունները վատացան, երբ նոյեմբերի 24-ին Թուրքիայի ռազմաօդային ուժերը Սիրիայի տարածքի երկնքում խոցեցին ռուսական «Սու-24» ռմբակոծիչը:
Նոյեմբերի 8-ին Պուտինը հրամանագիր է ստորագրել, որի համաձայն՝ ավիաընկերություններին ժամանակավորապես արգելվում է թռիչքներ իրականացնել Եգիպտոս՝ Սինայում ռուսական Airbus A321 ինքնաթիռի կործանումից հետո, որի հետևանքով զոհվել է 224 մարդ: