Հայաստանում աշխատանքով ապահովվածների թիվն առաջին եռամսյակի համեմատ նվազել է 2, իսկ նախորդ տարվա նույն ժամանակահատվածի համեմատ` 8,5 տոկոսով: «Արմենպրես»-ի հաղորդմամբ` նոյեմբերի 30-ին լրագրողների հետ հանդիպմանն այս մասին ասել է ԱՎԾ աշխատանքի վիճակագրության բաժնի պետ Լուսինե Քալանթարյանը:
«Հայաստանում երկրորդ եռամսյակում ունենք 242 հազար գործազուրկ, ինչը նախորդ եռամսյակի համեմատ նվազել է 7 տոկոսով, իսկ նախորդ տարվա նույն ժամանակաշրջանի համեմատ 3,5 տոկոսով»,- նշել է բաժնի պետը:
Քալանթարյանի խոսքով` 2015 թ. երկրորդ եռամսյակում աշխատանքի շուկայում անցկացրած հետազոտությունների համաձայն Հայաստանում զբաղվածների և գործազուրկների թիվը միասին կազմում է` 68 տոկոս, որից 45 տոկոսը զբաղվածներն են, 18 տոկոսը` գործազուրկները: 37 տոկոսն էլ զբաղեցնում են Հայաստանի աշխատանքային ռեսուրսների այն հատվածն, ովքեր աշխատանք չունեն և չեն փնտրում:
«Աշխատանք չունեցողների և չփնտրողների դասակարգում հիմնական մասը զբաղեցնում են սովորողները, ուսանողները, մյուսը մասը՝ տնային տնտեսություններ վարողները, որոնց գերակշիռ մասը կանայք են, երրորդը` կենսաթոշակային տարիքի բնակչությունը»,- հավելել է Քալանթարյանը:
